Werkers wat nie middagete neem ‘R500 000 kwyt’

Tweederdes van Suid-Afrikaanse werknemers sit en werk terwyl hulle hul middagete geniet, al is die meeste geregtig op tot ‘n uur lange middagetepouse. Foto: Morné van Rooyen

Suid-Afrikaners doen gemiddeld meer as R500 000 gratis werk deur nie die middagetes te neem waarop hulle geregtig is nie.

Die werksoekwebwerf Career Junction het ʼn peiling onder meer as 3 000 Suid-Afrikaanse werkers gedoen en tot dié gevolgtrekking gekom: As tyd geld is, verloor die deursneewerker in sy lewe ʼn fortuin weens pligsgetrouheid.

Die webwerf sê Suid-Afrikaners word gewoonlik as ʼn ontspanne nasie beskryf, maar wat werksetiek betref, is ons blykbaar van die hardwerkendste mense op aarde. En Career Junction se navorsing bewys dit.

In die peiling is bevind een uit drie Suid-Afrikaanse werkers is geregtig op ʼn halfuur lange middagetepouse, 7% mag 40 minute neem en meer as die helfte ʼn hele uur.

Tog sê meer as tweederdes hulle eet hul middagete by hul lessenaar en 71% sê hulle snuffel op die internet wanneer hulle nie tydens hul middagete iets eet nie.

In Brittanje gebruik net 44% werkers nie hul volle middagetepouse nie, maar in Suid-Afrika is dit sowat 66%. Career Junction meen dis “skokkend” dat 20% werknemers geensins van hul middagetepouse gebruik maak nie en meer as ʼn derde sê hulle verlaat hul lessenaar om ʼn draai te loop en om geen ander rede nie.

Die webwerf skryf ʼn mens moet wonder watter invloed Suid-Afrika se hoë werkloosheidsyfer en moeilike ekonomiese klimaat op dié syfers het. “Werk Suid-Afrikaners dalk vrywillig oortyd om te bewys hoe waardevol hulle vir hul werkgewer is en dat hulle onvervangbaar is?”

In die peiling het die meeste respondente aangedui hulle het toegang tot ʼn kombuis en ʼn plek met sitplekke waar hulle weg van hul lessenaar af kan eet. Tog gebruik die meeste dit nie, maar verkies om by hul rekenaar te sit en eet.

Blykbaar speel ʼn tekort aan besteebare kontant ook ʼn rol in werkers se eetgewoontes. Al het 100% respondente toegang tot ʼn eetplek binne 10 minute van hul werkplek af, gebruik minder as die helfte dit en dan ook net af en toe. Byna 60% bring iets te ete van die huis af saam en amper die helfte bestee minder as R100 per week aan middagetes.

Vreemd genoeg het meer as tweederdes van die 3 000 respondente gesê hul werkgewer moedig hulle aan om middagete te neem, maar amper ʼn vyfde het gesê druk word op hulle uitgeoefen om strykdeur te werk, terwyl amper 40% gesê het hul werklas is te groot om middagete te neem.

Gevra hoe dit hulle laat voel om nie middagete te neem nie, het die meeste werknemers gesê “ongelukkig” en “gestres”. As dit nie genoeg rede is vir middagete-verposings nie, sê Career Junction, sal die wete dat al die verlore middagpouses neerkom op 2,2 jaar lange gratis werk vir hul werkgewer hulle dalk oortuig.

“Dit kom neer op gratis werk ter waarde van R512 465 en onnodige tyd wat mense by hul lessenaar deurbring,” het die webwerf bereken. En as jy bo die nasionale gemiddelde van R13 621 per maand verdien, is dié bedrag selfs hoër.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

57 Kommentare

jongste oudste gewildste
Netso

Toemaar hulle maak dit op met hulle foon en knaende ” smoke breaks “!

jaco

hierdie studie is seker nie in die SA staatsdiens gedoen nie. daar is sommer die hele dag middagete en word glad nie gewerk nie.

Human

Ja en die Maan is van kaas gemaak.

Hennie

Dis hoe ons is! Dis hoekom ons sukses bereik. Dis hoekom ons gewild is in die buiteland.

Johanna Botha

Sal graag wil weet wat al die smoke breaks en selfoon gepeuter die werkgewer kos ?