Werkersdag: Uitjouery beplan om Zuma te verneder, sê Magashule

Lede van Cosatu tydens Werkersdagvieringe (1 Mei 2017) Foto: Cosatu, Twitter

Ace Magashule, voorsitter van die ANC in die Vrystaat en premier van die provinsie, het Maandag gesê die uitjouery van pres. Jacob Zuma en die gevolglike ontwrigting van Cosatu se Werkersdagvieringe in Bloemfontein was beplan om die staatshoof te verneder.

Maroela Media het vroeër berig alle toesprake is gekanselleer toe Zuma by Loch Logan opgedaag het voor ʼn skare wat “Zuma must fall” gedreunsing het. ʼn Tweede groep het pro-Zuma-krete geskree.

“Dit was vooraf beplan om die leierskap te verneder. Daar is mense wat dit beplan het. Ek het gehoor daar is mense wat hierdie byeenkoms wou ontwrig wat nie eers van hierdie provinsie is nie. Ons het ons video’s geneem, ons sal dit analiseer. Ons vergader môre met alliansie-beamptes,” het Magashule gesê.

“Ek weet dit was ʼn nasionale byeenkoms, maar ek sê net mense in hierdie provinsie is gedissiplineerd. Dit is ʼn vernedering, maar ons het vir hierdie vryheid baklei. Ons het geveg vir werkers se regte.”

Magashule het ʼn boodskap vir leiers in die drieparty-alliansie ANC, SAKP en Cosatu: “Diegene wat ons wil bestuur en na die media toe gaan, asof hulle nie interne konflik het nie, vir hulle sê ons julle veroorsaak ʼn gemors vir hierdie land.”

Hy hou vol die “massas” is lief vir Zuma.

“Die mense ondersteun steeds Jacob Zuma. Miljoene van ons mense het vir die ANC gestem. Kyk waar Zuma gaan en kyk hoe word hy ondersteun. Dit gaan nie oor Zuma nie. Die vyande van die ANC weet hulle moet Zuma aanval. Hulle het [vroeër] Mandela en Mbeki aangeval. Nou val hulle Zuma aan. Hulle sal enigiemand aanval wat die president van Suid-Afrika word – om die ANC te verswak,” het hy gesê.

Zuma se lyfwagte het Maandag vinnig met hom weggery nadat dit duidelik was dat talle vakbondlede hom nie sou toelaat om te praat nie. In een stadium het die polisie voor ʼn grensdraad gaan staan tussen die skare en die markiestent waar Zuma gesit het, toe die mense teen die staalheining begin druk het.

Zuma het afgehaal gelyk toe hy tussen Sdumo Dlamini, president van Cosatu, en Blade Nzimande, sekretaris-generaal van die SAKP, gesit het. Die president het toegekyk hoe die twee groepe met mekaar baklei het. Hy het die byeenkoms kort daarna verlaat.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

29 Kommentare

jongste oudste gewildste
LMF

Hie hie lekker man lekker

pieter

Siestog seker nou weer Jan Van Riebeeck se skuld of die wittes. Dis julle eie mense wat in opstand kom so Mnr Zuma maak oop jou oe klappe jou mense soek jou nie meer nie. Die ANC het van Mbeki ontslae geraak niemand ander nie.

Piet

Nou wie wou nou weer kastig vir Mandela en Mbeki aanval, wat nog steeds aan die werk is? Siestog dis al weer die blankes wat alles orkestreer. Het hulle nou nog nie agter gekom dat die regse blanke sal nie saam met die DA gaan toitoi nie?

Johann

Hahaha, hahaha aan, grootste grap in die geskiedenis

Jordaan

Sulke rassiste! Ha-ha, mens mag seker maar lekker kry.