Werkloosheid is ʼn ‘nasionale krisis’, sê ANC

ANC-se-vlag-deur-ANA

Foto: ANA

Die ANC het Dinsdag gesê hy maak gereed vir ʼn nywerheidstrategie om die regering te help met die hoë werkloosheidskoers en ongelykheid in die land.

Ace Magashule, sekretaris-generaal van die ANC, het gesê die party se nasionale uitvoerende komitee (NUK), wat oor die naweek tydens ʼn lekgotla vergader het, het bepaal die fokus van sy sesde administrasie sal versnelde implementering wees, en met alle Suid-Afrikaners saamwerk.

Die makgotla is byeenkomste van die ANC-NUK, alliansievennote en kaders in die parlement, wetgewers en ander sfere van die regering om ʼn algemene program te bespreek met die primêre fokus op die transformasie van die Suid-Afrikaanse samelewing.

Magashule het gesê werkloosheid en ongelykheid bly een van die grootste uitdagings, aangesien ongeveer 10 miljoen Suid-Afrikaners werkloos is. “Lekgotla het saamgestem dat werkloosheid ʼn nasionale krisis is. Lekgotla het ingestem om die werkloosheidkoers oor die volgende vyf jaar van 27,6% tot 14% te verminder en te fokus op vaardigheidsontwikkelingprogramme van 3,5 miljoen jong Suid-Afrikaners.”

Hy het gesê die ANC het ten doel om werkskepping te behaal deur die nywerheidstrategie, Job Summit-inisiatiewe, Operasie Phakisa en die Private Public Growth Initiative.

Die nywerheidstrategie sal 10 bedrywe teiken insluitend die motorbedryf, klere en tekstiel, leer en skoene, gas, chemikalieë en plastiek, staal en metaal, toerisme, tegnologie, kunste, oseane-ekonomie en landbou- en agroprosessering.

Magashule het gesê die lekgotla het ook ingestem om die mandaat van die Suid-Afrikaanse Reserwebank uit te brei tot meer as prysstabiliteit om ook groei en indiensneming in te sluit, volgens die opdrag van die party se 54ste nasionale konferensie in 2017.

“Die ANC-regering moet dit ook oorweeg om ʼn taakspan aan te stel om interregeringskuld te verlig om fondse beskikbaar te maak vir ontwikkelingsdoeleindes. Hierdie maatreëls moet egter nie ʼn inflasie-impak op die rand en behoeftige mense hê nie. Dit is ʼn bestendige praktyk deur ontwikkelde lande om hul ekonomieë te red. Dit sal ʼn beslissende impak hê op die uitdagings van werkloosheid, armoede en ongelykheid.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

36 Kommentare

jongste oudste gewildste
schaun

Stop die diskriminerende wette teen minderhede soos swart bemagtiging en werk geleenthede sal toeneem verskerp dit en nie alleen sal die ekonomie val nie maar werk’s geleenthede sal bly afneem.

jaco

eintllk behoort het wit mense en tot n mate kleurlinge en indiërs werkloos te wees, want hulle is altyd die slagoffers van regstellende aksie.
ek kan swart werkloosheid glad nie verstaan nie. Slegs die “regte” velkleur is dan nodig om werk te kry. kwalifikasies en ondervinding tel nie.

Emma

Dit sal n probleem bly oor julle arbeidswette, wat het julle verwag probeer net die werkgewer bykom. My siening

James

Moorde ook

Karel

Sê dit al van 1994 af.