Wes-Kaapse boer hoor eers dán oor borgtog

Argieffoto

Frik Muller, die boer van Herbertsdale buite Mosselbaai in die Wes-Kaap wat onder meer van poging tot moord aangekla word nadat hy na bewering maande gelede met ʼn trekker teen ʼn voormalige plaaswerker se huis vasgery het, het steeds nie ʼn antwoord oor sy aansoek om borgtog nie.

Sers. Kappi Kapp, woordvoerder van die polisie, het aan Maroela Media bevestig Muller het 23 Julie in die Mosselbaai-landdroshof voorgekom waar sy aansoek om borgtog weereens uitgestel is.

Dié keer is sy saak tot 15 Augustus, weer in die Mosselbaai-landdroshof, uitgestel vir die aansoek om weer aangehoor te word.

Dit is in dié stadium onduidelik wat presies daartoe aanleiding gegee het dat die aansoek weereens uitgestel is.

Muller se regsverteenwoordigers het vroeër aangedui dat hulle nuwe getuienis het om voor die hof te bring, maar Kapp het dit weerlê en gesê daar het eintlik “niks daarvan gekom nie”.

Maroela Media het vroeër berig die landdros het die saak op 19 Junie uitgestel tot 23 Julie, aangesien hy die getuienis van die ondersoekbeampte weer wou aanhoor.

Muller staan tereg op aanklagte van poging tot moord, aanranding met die doel om ernstig te beseer, opsetlike saakbeskadiging en die onwettige besit van ʼn vuurwapen en ammunisie.

Die slagoffer, Hylton Levendal, is glo al in Desember afgedank, maar het geweier om die plaas te verlaat. ʼn Onderonsie tussen Muller en Levendal het ontstaan, wat daartoe gelei het dat Muller glo met ʼn trekker teen die muur van die werker se huis vasgery het.

Van die bakstene van die huis het op Levendal geval en hy is glo gering beseer.

Muller word steeds in ʼn gevangenis in George aangehou.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

13 Kommentare

jongste oudste gewildste
ZAR

Frik ons bid vir jou. Hier is mense wat vir jou baklei. Jy is nie alleen nie…

SjN

Regstelse het ontaard in n sirkus

Boertjie

Sulke tipe onregverdigheid moet die hele wereld wyd gepubliseer word dat nense in ander lande ook kan sien wat aangaan in SA.!!!!

Hanna Hoekom

Nou verstaan ek nie: laas week is n gawe ou oom in sy huis doodgeslaan. Die moordenaar het reeds van tevore probeer om die oom te verwurg (die oom het toe voorgegee dat hy dood is en die aanval oorleef). Daardie selfde krimineel het borgtog gekry. En daarna sy daad gaan voltooi… Mis ek iets? Dalk werk ons regstelsel net nie, want hierdie is n absolute belaglike saak. Die voormalige werker woon seker steeds op die plaas.

HPV

Praktiese voorbeeld van toepassing van dubbel standaarde teen ‘n minderheidsgroep. Weermaglid skiet vrou, word nie eers in hegtenis geneem …?