Wetgewer reageer ná LUR se beweerde uitsprake

Mathabo Leeto, die Vrystaatse LUR vir sport, kuns, kultuur en ontspanning. Foto: artsculturesa.wordpress.com

Die kantoor van die Vrystaatse wetgewer het Vrydag gesê hy kan nie bevestig of Mathaba Leeto, LUR vir sport, kuns, kultuur en ontspanning in dié provinsie, wel na wit mense as “verkragters” verwys het nie.

Volgens die DA het Leeto dié omstrede uitsprake op 3 Augustus tydens ʼn debat oor Vrouedag in die wetgewer gemaak.

Life Mokone, woordvoerder en hoof van kommunikasie in die wetgewer, het aan Maroela Media gesê hy kan bevestig dat Leeto wel aan hierdie debat deelgeneem het. “Ons kan nie in dié stadium bevestig of die LUR na wit Suid-Afrikaners as verkragters verwys het nie. Dit is daarom dat [Jonas] Ramokhoase, die voorsitter van komitees wat die voorsittende beampte tydens die sitting op 3 Augustus was, besluit het om die saak eers te ondersoek om vas te stel wat die presiese woorde was wat die LUR gebruik het voordat hy ʼn beslissing maak,” het Mokone gesê.

Hy het daarop gewys dat die debat oor Vrouemaand ʼn politieke debat was en dat dit daarom belangrik is om die “konteks” te verstaan waarin politici uitsprake gemaak het. Hy het gesê die speaker sal die woordelikse verslag van die verrigtinge nagaan voordat hy ʼn beslissing oor die saak maak.

“Dit is normale prosedure wanneer daar debatte in die wetgewer is. Eerbare lede het die neiging om almal gelyk te praat en dit het ʼn negatiewe uitwerking op die voorsittende beampte se vermoë om onmiddellik ʼn beslissing te maak. Die beslissing word daarom voorbehou tot die volgende sitting wanneer die voorsittende beampte die geleentheid sal kry om die saak te oorweeg en ʼn oordeel te vel.”

Mokone het bevestig dat die gedrag van lede van die wetgewer volgens die wetgewer se reëls gereguleer word en dat sake soos dié na die Etiek- en Ledebelange-komitee verwys kan word om verder ondersoek te word.

Op ʼn vraag of die wetgewer stappe teen die DA sal doen indien dit aan die lig kom dat die bewering vals is, het Mokone geantwoord die wetgewer kan nie verantwoordelikheid neem vir lede se gedrag buite die wetgewer nie. “Dit word dan ʼn saak tussen die lid en die party waaraan die lid behoort. Dit kan ook ʼn siviele saak word tussen die gegriefde lid en die lid wat die stellings in die openbaar gemaak het,” het hy gesê.

Maroela Media het vroeër berig Leeto het erg onder skoot gekom nadat Mariette Pittaway, ʼn DA-lid van die Vrystaatse wetgewer, beweer het Leeto het gesê wit Suid-Afrikaners is verkragters “so ver terug as toe Jan van Riebeeck in die land aangekom het”. Pittaway het verder beweer Leeto het gesê wit mense se grafte moet opgegrawe word “sodat hul lyke kan rekenskap gee” en het na bewering na Roy Jankielsohn, die leier van die amptelike opposisie in die Vrystaatse wetgewer, as ʼn stuk ontlasting verwys.

Die burgerregte-organisasie AfriForum het hierna ʼn skrywe aan Sisi Ntombela, die Vrystaatse premier, gerig waarin Leeto se afdanking geëis word. Intussen het die Afrikanerbond ʼn amptelike klag by die Menseregtekommissie ingedien en versoek dat die kommissie die saak ondersoek en stappe teen Leeto doen.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

24 Kommentare

jongste oudste gewildste
Willem

Bestaan daar dan nie bandopnames of transkripsies in die wetgewer van die mense wat aan die debat deelgeneem het en daar gesê is nie?

Wurmpie

Verskonings

Elvira

Altyd n storie as dit by hierdie onaantasbares kom.

Reg

Hier gaan duidelik dadels van kom.

sons

Verskonings op verskonings, op verskonings….