Wettige vuurwapen-eienaars nie die oorsaak van geweldsmisdaad in SA

Argieffoto

Volgens die VF Plus is wettige vuurwapen-eienaars nie die oorsaak van geweldsmisdaad in Suid-Afrika nie.

“Daar moet eerder gefokus word op ander oorsake soos die SA Polisiediens wat meer as 18 000 vuurwapens in net vyf jaar verloor het,” het Pieter Groenewald, woordvoerder van die VF Plus, Dinsdag gesê.

Groenewald meen die oproep gaan al hoe meer op – ook vanaf vooraanstaande persone in die land – dat daar strenger vuurwapen-wetgewing moet wees weens die hoë vlakke van geweldsmisdaad en die ANC is aan die voorpunt hiervan.

Volgens Groenewald mislei die regering homself indien daar geglo word dat strenger wetgewing wat vuurwapen-eienaarskap sal beperk, misdaad gaan beperk. “ʼn Ontwapende gemeenskap is presies wat misdadigers wil hê. Dit sal misdaad laat styg en daar is wetenskaplike studies hieroor gedoen,” het hy gesê.

Groenewald het ook gesê die groot probleem is onwettige vuurwapens soos dié van die polisiediens wat 18 000 in net vyf jaar verloor het. “Die vraag moet eerder gevra word of dit nie is waar die probleem lê nie. Misdaad het gestyg weens politieke inmengery in die polisie, korrupsie, swak bestuur en ʼn gebrek aan dissipline. Dit en die strafregstelsel moet eers reggestel word voordat daar gefokus word op wettige vuurwapeneienaars, want hulle is nie die probleem en oorsaak van geweldsmisdaad nie.”