Wildrit-voertuig omgegooi; olifant nié van kant gemaak

Die Nkomazi-wildreservaat in Mpumalanga het ten sterkste gerugte op sosiale media ontken dat ʼn olifantkoei en haar kalf van kant gemaak gaan word weens ʼn voorval verlede maand waar ʼn wildbesigtingsvoertuig omgegooi is.

Nick Webb, ʼn direkteur van Nkomazi, het die voorval aan Maroela Media bevestig. “Gelukkig is die gaste, personeel en dier nie ernstig beseer nie,” het Webb gesê. “ʼn Ondersoek na die voorval het ongelukkig tot voortydige spekulasie en hoorsê gelei. Daar is geen rede om die olifant van kant te maak nie. Die olifant het al in die verlede aggressiewe gedrag getoon maar ons monitor die situasie deurlopend.”

Volgens Webb sal daar na verskeie alternatiewe gekyk word indien die olifant se aggressiewe gedrag voortduur en die dier ʼn bedreiging inhou vir die reservaat se gaste of personeel. “Verskeie opsies is onder oorweging insluitend die moontlikheid om die olifant na ‘n groter reservaat te skuif waar daar minder kontak met mense is.”

Webb het gesê daar steek ook geen waarheid in gerugte dat die wildbewaarder wat die voertuig bestuur het, tussen die olifantkoei en haar kalf ingery het of te naby aan hulle stilgehou het nie. “Ons is tevrede dat daar aan al die nodige bedryfstandaarde en -riglyne rakende wildbesigtiging voldoen is en die voorval helaas plaasgevind het as gevolg van aggressie deur die olifant.”

Volgens Webb is die veiligheid van hul gaste en diere die reservaat se eerste prioriteit. “Met dit in oorweging moet ons na al die moontlikhede kyk om te verseker dat daar nie ʼn herhaling van die voorval is nie. Dit sal absoluut die laaste uitweg wees om die dier van kant te maak en so besluit sal deur ervare en hoogs gekwalifiseerde kenners gemaak word in samewerking met die provinsiale parke-owerheid en om die rede word alle ander uitvoerbare alternatiewe geëvalueer.”

Die gerug wat op sosiale media versprei is, het aangevoer dat ʼn werknemer van die reservaat afgedank is nadat hy inligting oor die voorval aan die media uitgelek het. Volgens Webb is die werknemer meegedeel dat daar ʼn ondersoek sal wees na sy gedrag waarna hy glo vrywilliglik bedank het.