‘Winkelpersoneel’ besteel glo bejaarde

Argieffoto ter illustrasie van ‘n winkelsentrum. (Foto: Pixabay)

Die Vrystaatse polisie is op die spoor van drie verdagtes wat na bewering vroeër vanjaar hulself as werknemers van ’n kettingwinkel voorgedoen en ’n bejaarde in Welkom besteel het.

Genl.maj. Solly Lesia, woordvoerder van die polisie, sê in ’n verklaring die bejaarde is op 1 Julie vanjaar van haar handsak beroof toe drie verdagtes haar omstreeks 15:40 buite ’n winkel genader het.

Volgens Lesia het die verdagtes vir die bejaarde vrou gesê dat sy kwansuis vir ’n pensioenariskaart by die betrokke winkel in aanmerking kom wat haar geregtig sal maak op afslag by dié winkel.

“Een van die verdagtes het die slagoffer se handsak gevat terwyl hulle saam met haar in die winkel ingeloop het. Die vrou is gemaan om na ’n spesifieke toonbank te gaan waar sy een van die verdagtes sou ontmoet en haar handsak terugkry,” verduidelik Lesia.

Die bejaarde vrou het salig onbewus na die toonbank gegaan op soek na die vrou wat haar handsak by haar gevat het. Daar was egter geen teken van die vrou nie aangesien die verdagtes glo met die handsak laat spaander het. ’n Veiligheidswag se hulp is ingeroep om na die verdagtes te soek, maar dié kon hulle nie opspoor nie.

Volgens Lesia is die verdagtes met onder meer ’n bankkaart, ’n selfoon en kontant in die handsak vort. Later sou hulle R5 000 uit die bejaarde se rekening onttrek en R4 000 se geskenkbewyse by die Goldfields-winkelsentrum koop.

’n Saak van roof is by die polisie aanhangig gemaak. Niemand is nog in verband met die voorval in hegtenis geneem nie.

Enigeen met inligting wat tot die inhegtenisneming van die verdagtes kan lei, word versoek om ao. Riaan de Lange by 057 391 6271 gedurende kantoorure te bel.

“Mense moet bewus wees daarvan dat misdadigers tydens die feesseisoen enigiets sal doen om slagoffers se hardverdiende kontant in die hande te kry. Mense moet dus voorsorgmaatreëls tref om hul geld te beskerm en hulle daarvan weerhou om enigiemand met hul bankkaarte of handsakke te vertrou,” waarsku Lesia.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

17 Kommentare

jongste oudste gewildste
Chris Ws

Mense leer net nie!

JohanR

Terwyl ek en jy hard werk en belasting betaal, het hierdie ly gemors al die tyd om planne uit te dink hoe om jou geld aan die hande te kry. Kyk maar toe die terug keurende Springbokke by OR land, hoeveel mense is van hulle beuries verlig. En soe sit hulle om ‘n vuurtjie en bedink planne om ‘n plaas aan te val, of by ‘n huis in te breek. Voel rerig niks as ‘n boer of huiseienaar ‘n aanvaller/s doodskiet nie. Wat soek hy in MY huis, op MY plaas, of in MY tuin? Dis nog nie joune nie… Lees meer »

Melanie

Kom nou net terug van plaaslike kettingwinkel waar ek langs ‘n vrou (45-50 jarige) gestaan het. Terwyl sy R200 betaal het aan lotto kaartjies, het haar handsak wawyd in haar stootwaantjie oop gelê. Die waantjie was agter haar rug en enigiemand kon verbyloop en doodluiters die handsak gaps en laat spaander. Party mense leer blykbaar nooit.

DVL

1 Julie? bietjie baie ver van die fees seisoen af

Strandloper

Dit is menslike natuur om ander oor die selfde kam te skeer as jy wets gehoorsamm is….die werklikheid is gewoonlik n nagmerrie….