Inwoners van Kleinbaai is die afgelope week aangenaam verras deur verskeie besigtigings van grootwithaaie in dié omgewing – tussen Gansbaai en Franskraal. Dit nadat ʼn aansienlike afname in haaigetalle sedert 2017 in Gansbaai waargeneem is.
Kenners skryf dié afname grotendeels toe aan die voorkoms van moordwalvisse (Orcinus orca) in die omgewing van Kleinbaai ʼn paar jaar gelede. “Dié visse het ʼn voorliefde vir grootwithaaie se lewers en vanaf 2017 het ons ʼn toename gesien in lewerlose withaaie wat uitspoel,” het die mariene bewaarder Wilfred Chivell gesê. Chivell is die uitvoerende hoof van Marine Dynamics en ook stigter van Dyer Island‑bewaringstrust. Hy meen klimaatsverandering kon ook ʼn afname in grootwithaaigetalle tot gevolg gehad het.
Hoe dit ook al sy, vir toeriste en die bemanning van die haai-boot Slashfin was Sondag ʼn vreugdevolle ervaring toe hulle ʼn withaaiwyfie van ongeveer 2,5 meter lank in die water gewaar, duidelik sigbaar en naby aan die boot. “Die afgelope tyd was dit meestal brons- en skerpneushaaie wat deur die ekotoerisme‑bote gewaar is,” sê Chivell. “Die afgelope week het besoeke ook daagliks tussen twee en drie withaaie opgelewer wat deur Marine Dynamics se bote opgemerk is. Dit is dus veilig om te sê dat die withaaie weer terug is in Kleinbaai.”
Chivell sê hy hoop dat Marine Dynamics se navorsing lig kan werp op die haaie se skielike verdwyning en terugkeer na Kleinbaai. Deur Chivell se ekotoerismeprojekte word navorsingsprojekte oor die grootwithaai gefinansier sodat data deur plaaslike en internasionale universiteite en wetenskaplikes gebruik kan word om soveel as moontlik inligting in te win oor die spesie se dalende getalle. “Die withaai speel ʼn kritieke rol as roofdier in die mariene ekostelsel en ons as mens moet dié diere beskerm, eerder as vrees.”
O’ okay