Woede ná man wat eenjarige raakry, ‘skotvry’ wegstap

Chiedza Sjambok en haar dogter, Britney (1). (Foto: ANA)

Die ma van die eenjarige Britney Ruguwa, wat dood is nadat sy in April vanjaar by ʼn dagsorgsentrum in Johannesburg raakgery is, het onbedaarlik gehuil nadat sy gehoor het die saak teen die betrokke motoris is teruggetrek.

“Ek het verlede week in die openbare galery van die Hillbrow-landdroshof gesit en ek kon nie my ore glo nie. Selfs nou maak ek myself wys dat ek verkeerd gehoor het. Dit kan nie waar wees nie. Hoe kan die strafregstelsel ʼn man laat gaan wat erken het dat hy oor my kind gery en haar dood veroorsaak het,” het Chiedza Sjambok gesê.

“Ek kan dit nie glo nie. Sê die strafregstelsel dat my dogter verkeerd was? Al wat ek vra, is geregtigheid vir my kind sodat ek aan haar broer en suster kan verduidelik hoe sy dood is.

“Ek het in ongeloof gekyk hoe stap die beskuldigde uit die hof. Iets is nie reg nie. Hoe ry jy oor ʼn eenjarige en die hof laat jou skotvry wegstap. My kind het ʼn pynlike dood gesterf, doodgedruk deur ʼn bewegende voertuig. Het ek ʼn fout gemaak om my dogter na daardie dagsorgsentrum te neem? Sedert April het nie ʼn enkele mens ‘jammer’ gesê nie. ”

Maroela Media het vroeër berig klein Britney is op 13 April dood nadat ʼn voertuig op die Busy Bears-dagsorgsentrum se terrein in Rembrandtpark oor haar gery het. Haar ma het haar vroeër die oggend op pad werk toe daar afgelaai.

Jonathan Zulu is later in hegtenis geneem nadat burgerregtegroepe druk op die Sandringham-polisiestasie geplaas het.

Die Nasionale Vervolgingsgesag (NVG) se woordvoerder in Gauteng, Phindi Mjonondwane, het bevestig die saak is teruggetrek.

“Die saak is verlede Vrydag teruggetrek. Die beskuldigde [Jonathan Zulu] het suksesvolle voorleggings aan die NVG gedoen,” het Mjonondwane gesê.

Britney se pa, Nick, het gesê die gesin het nie eens geweet wie die prokureur van die regshulpraad was wat hulle in die saak verteenwoordig het nie.

“Selfs die ondersoekbeampte, ʼn mnr. Manaka van die Sandringham-polisie, praat nie met ons nie. Die saak spook by ons. My vrou het die hofverrigtinge vyf keer bygewoon. Ons het nie geweet wat aangaan tot die beskuldigde weggestap het nie,” het Nick Ruguwa gesê.

“My vrou huil elke keer wat sy die kleuterskoolhoof in die buurt sien. Sy huil troosteloos.

“Ons is tot op die nippertjie in die duister gehou. Ons het niks geweet nie, nie eens wie die aanklaer was nie. Ons het nie ʼn sentimeter beweeg sedert die voorval in April gebeur het nie.”

Die burgerregtegroep Sanco het ná die voorval gevra vir ʼn ondersoek na hoekom die polisie aanvanklik nie ʼn saak van strafbare manslag teen Zulu aanhangig wou maak nie. ʼn Aanvanklike saak van roekelose en nalatige bestuur is eers geopen, maar is ná volgehoue druk na strafbare manslag verander.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

46 Kommentare

jongste oudste gewildste
Annette

Dis nie reg wat hier gebeur het nie.

Moedeloos

Ek weet van n geval waar n man doodgeskiet is, moordenaar het dit erken en na 2 jaar is hy ook gelos. Welkom in SA

Martie

Dit is Suid Afrika in die land kry n dief R3000 borg en n moordenaar R1000 borg en dan ook partykeer gaan mense wat onskuldig is tronk toe en die wat skuldig loop vry uit n hof.

James

Sterkte mev. Wens net almal wil reg stem dat hierdie land gered kan word. Maar heeltyd ANC en maatjies.

Cherokee

Mikey Schultz en Nigel Mcgurk wat Brett Kebble vermoor het en dit erken het, het vry uit die hof gestap. Schultz het die sneller getrek en dit erken. Hulle is nie slegs vrygespreek maar het hul vuurwapens, 9 daarvan, terug gekry.