Woede oor volgehoue verbod op sigaretverkope

(Foto: pixabay)

Die Fair Trade Independent Tobacco Association (FITA SA) sê hy win ʼn regsmening in nadat die regering aangekondig het dat die verbod op die verkoop van sigarette ook op vlak 4 van die afsonderingstydperk volgehou gaan word.

Die organisasie het onderneem om later meer besonderhede oor enige moontlike regs- of ander optrede bekend te maak.

Die minister van samewerkende regering en tradisionele sake, Nkosazana Dlamini-Zuma, het Woensdagaand in ʼn verrassende wending aangekondig die verbod op die verkoop van tabakprodukte gaan tydens vlak 4 van die afsonderingstydperk steeds geld. Dít nadat pres. Cyril Ramaphosa verlede week gesê het die handel in sigarette sal tydens vlak 4-afsondering toegelaat word.

Dlamini-Zuma het gesê nadat aanvanklik voorgestel is dat die verbod op sigaretverkope opgehef word, het die regering sowat 2 000 voorleggings in die kommentaartydperk gekry waarin hy gevra is om nié die verbod op te hef nie.

Die regering voer aan rook verhoog mense se kanse om Covid-19 op te doen.

Intussen het amper 350 000 mense teen Donderdagoggend egter ʼn petisie onderteken om die voortgesette verbod op die verkoop van sigarette tydens die afsonderingstydperk te laat omkeer.

Die petisie voer aan die opheffing van die verbod gaan werksgeleenthede red, meer geld in die staatskoffers laat beland, die ekonomie stimuleer en die sielkundige uitwerking van die afsonderingstydperk op sekere Suid-Afrikaners minder maak.

“Moet ons asseblief nie in misdadigers verander nie, meneer die president,” lui die petisie.

Op sosiale media het talle mense ook hul misnoeë met die besluit te kenne gegee. Talle van die bepalings – ook die verbod op sigarette – is as “belaglik” bestempel.

“Die regering maak misdadigers van ons wat tot dusver alles reg gedoen het. As die president dit toelaat, gaan hy enorme steun verloor. Onwettige tabakhandelaars gaan wen,” het een sosialemediagebruiker gesê.

Die regskenner Dario Milo het op Twitter geskryf indien ʼn hersiening in die hof oor die besluit gedoen word, kan die regering se skielike ommeswaai daaroor vrae laat ontstaan. “Wat was die inligting waarop die president se kommentaar berus het en hoe is dit moontlik dat dié inligting binne ʼn paar dae verander het?”

Die organisasie TAX Justice SA (TJSA) het die besluit om die verbod vol te hou as “lewensbedreigende ekonomiese sabotasie” bestempel.

TJSA-stigter Yusuf Abramjee het gesê die nasionale bevelsraad se u-draai oor die besluit wat pres. Cyril Ramaphosa al verlede week geneem het, is teenstrydig met alle bewyse.

“Die ondeurdagte verbod op sigarette verarm die land, verryk misdadigers en vernietig die publiek se geloof in die afsonderingsproses.

“Die regering gooi elke dag R35 miljoen belasting weg op ʼn tydstip dat mense sterf van die honger. Intussen steek misdadigers dié geld in hulle sakke deur Suid-Afrika se 11 miljoen rokers na die swart mark te lok,” het Abramjee gesê.

Terwyl die verbod op die verkoop van tabakprodukte voortduur, floreer die onwettige bedryf. (Argieffoto: SA Polisie)

Hy sê onwettige sigarette oorstroom die mark teen opgejaagde pryse. Die staat verdien geen belasting uit die verkoop van dié sigarette nie en dit veroorsaak al hoe meer beweging onder mense wat nou desperaat op soek is na sigarette – juis dít wat met die afsonderingsregulasies bekamp moet word.

“Die regering weet die onwettige ekonomie floreer. Vroeër vandeesweek het ʼn verslag deur die Raad op Geesteswetenskaplike Navorsing (RGN) bevind een uit vier inwoners van informele nedersettings kan sigarette koop.

“Die RGN het voorgestel dat dringende stappe gedoen word om die probleem met onwettige handel te stuit. Die minister se aankondiging is teenstrydig met dié aanbeveling; hulle weier belangrike inkomste en laat misdaad toe om te floreer,” het Abramjee gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

85 Kommentare

jongste oudste gewildste
Josef

Ek wonder wie almal baat by die verkoop van sigarette op die swartmark? Het dit ‘n invloed op die minister se besluit?

Johann

Ongelooflik? Dat n nismark verbruikers hulle onwettige opsies om n verslawing na te jaag, as dreigement gebruik om die regering te dwing om wettige verkope af te dwing? Net in die RSA.

Die Wolf

Sien faceboek wat moontlik NZ se einde kan beteken.

Fedup

Who is the president of this infortunate country? If and when they are done playing their little childush power games, the whole truth and nothing but the truth about what we are to do and think about all of this 2 second changes each day, will be refreshing for a change.

Ansie

Die mense kry in elk geval sigarette in die hande, waarskynlik teen ‘n astronomiese prys wat tot verdere armoede ly wat tot verdere plundering gaan ly. Ek rook nie self nie, maar dink regtig die verbod op tabakverwante goedere kan maar opgehef word. Dit sal ten minste die ekonomie ‘n hupstoot gee.