Wolmaransstad-plaasmoord: ‘Landelike onveiligheid ANC se skuld’

(Argieffoto: Maroela Media)

Die DA in Noordwes het die voortslepende onveiligheid in landelike gebiede vierkantig voor die ANC-regering se deur geplaas.

Die party het gereageer ná die moord op ʼn boer van die omgewing, Schalk van der Merwe (67), en die ernstige aanranding op sy vrou, Lettie (66). Die egpaar is Sondag tussen 16:00 en 17:00 op hul plaas naby Wolmaransstad oorrompel, glo deur ʼn groep mense wat voorgegee het dat hulle skape wou koop.

Die egpaar se seun het een van die verdagtes uit die huis sien hardloop en daar op sy ma afgekom. Hy het daarna met ʼn soektog na sy pa begin en hom agter die voerbakke van een van die skaapkrale aangetref.

“Hierdie somber voorval laat net nóg ʼn gemeenskap, nóg ʼn familie en nóg ʼn [eggenoot] getraumatiseerd en vreesbevange ná ʼn trauma wat deur geen trooswoorde gesus kan word nie,” het Jacqueline Theologo, die DA se Noordwes-woordvoerder oor landbou en landelike ontwikkeling, gesê.

“Dit bly skokkend dat die ANC-regering toekyk hoe ons boere met soveel brutaliteit aangeval en vermoor word en steeds nie plaasmoorde as ʼn prioriteitsmisdaad wil verklaar nie.

“Om te voorkom dat nóg boere die landbousektor verlaat, moet ons hulle veiligheid prioritiseer en sodoende verseker dat voedselsekerheid nie verder bedreig word nie,” het Theologo gesê.

Sy het gesê landelike gemeenskappe het ʼn maklike prooi geword vir gewelddadige en wrede misdaad weens die polisie se versuim om te verseker dat sy beamptes kundig en goed opgelei is.

“In die lig hiervan, bedank ons die plaaswag-reaksiegroepe wat onmiddellik gereageer het en die gesin bygestaan het in hul uur van nood. Hierdie groepe het die rol van die polisie ingeneem en het onontbeerlik geword vir landelike gemeenskappe.”

Sy het gesê die DA het onlangs ʼn veiligheidsplan van R1 miljard vir die Wes-Kaap aangekondig en dat die ANC dieselfde moet doen en geld daarvoor bewillig.

“Ons doen dus weer eens ʼn beroep op die ANC-regering om landelike veiligheidseenhede op die been te bring ten einde dringende aksie te neem teen plaasaanvalle.

“In ons rol as opposisieparty sal die DA aanhou om druk te plaas op die ANC-regering om landelike gemeenskappe, boere en plaaswerkers te beskerm.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

45 Kommentare

jongste oudste gewildste
wraggies

Julle plaas nie genoeg druk nie, druk meer en druk harder.

Wielspore

Die DA se MO het verander met die nuwe leierskap en sy beleid jeens plaasmoorde het verander na kritiek teenoor die ANC waar hulle in die verlede daaroor geswyg het.

Werner

DA die regering stel nie belang om plaasmoorde op te los nie hulle maak dit onmoontlik dat ons selfs as riserviste aan kan sluit maar julle kan nogsteeds van ons stemme vergeet

Ingrid

Misdaad is buite beheer en dit word daagliks erger. ANC sal niks daaraan doen nie; hulle is kop in een mus

susan

Gee die DA tog net kans. Wat doen jy om dinge Beter te maak vir die land?