Wonderwerk ná wonderwerk red sendelingboer se lewe in plaasaanval

Mike Bonnette ná die aanval in die hospitaal. Foto: Verskaf

Wat bykans ʼn uur was, het vir Mike Bonnette (70), ʼn sendelingboer van Gauteng, soos ʼn dag gevoel nadat hy Sondag op pad kerk toe deur drie mans op sy plaas in die Midvaal-omgewing in Meyerton aangeval, erg aangerand en beroof is.

Bonnette is Vrydag uit die hospitaal ontslaan nadat hy ʼn week lank in die MediClinic Vereeniging mediese behandeling moes ontvang.

Hy het Saterdag vanuit sy huis aan Maroela Media verduidelik wat presies daardie dag gebeur het.

“My vrou, Margaret, is die oggend voor my kerk toe. Ek het sowat 09:20 kerk toe gegaan en was met my bakkie by die hek by ons huis uit, toe ek gestop het om dit toe te trek.”

Bonnette verduidelik hy het uit sy bakkie geklim, die hek toegetrek en toe hy in sy bakkie wou klim, het iemand hom van agter af geduik. “Ek het met die man begin stoei en toe ek weer sien, het twee ander mans voor my gestaan. Een van hulle het ʼn vuurwapen op my gerig en my daarmee oor my kop geslaan. Ek het die bloed oor my gesig voel loop en begin verward voel.”

Die aanvallers het Bonnette hardhandig hanteer en terug na sy huis toe gedwing terwyl hulle die heeltyd wou weet waar sy kluis is en aangedring het op geld.

“Toe ons in die kombuis kom, het ek vir hulle belowe dat ek nie ʼn kluis of baie geld het nie, maar ek het vir hulle gesê hulle kan vat wat ook al ek het. Hulle sit toe die ketel aan en die kortste van die drie sê: ‘You will learn to talk,’ en vra toe waar die strykyster is.”

Die aanvallers het Bonnette in die voorhuis in geboender, waar ʼn koord en muurprop van ʼn lamp uit die lamp geruk is. Een van die aanvallers het die koord om Bonnette se nek gedraai terwyl hulle weer gevra het waar sy kluis is. Bonnette het weer verduidelik hy het nie ʼn kluis nie. Hy is deur een booswig gewurg, terwyl die ander deur die huis gegaan en alles uit die kaste gepluk het, op soek na ʼn kluis en waardevolle besittings.

“Hulle wou ook my trouring aan my vinger hê, maar ek kon dit nie afkry nie. Hulle het gedreig om my vinger af te sny, maar ek het gevra dat ek seep moet kry. Genadiglik kon ek die ring draai en het hy uiteindelik afgekom. Die kortste een sê toe: ‘You’re not talking,’ en het toe ʼn verlengkoord gegryp, die punt afgetrek en met sy tande begin om die koperkabels te ontbloot.”

Bonnette het gesê die “kort man” het sonder aanhitsing aggressief geraak, en terwyl hy besig was om die kabels te ontbloot, het hy onder meer glo uitlatings gemaak soos “you stole our land”.

Die aanvaller het toe die ontblote koperkabels om Bonnette se enkels gedraai. “Hy was op pad na die muurprop om dit aan te skakel toe ek my bene beweeg en een kabel loskom. Die man het woedend geraak, my bene styf teen mekaar gebind en die kabels stywer vasgebind. Intussen het die hoofskakelaar van die elektrisiteit afgeskakel en die ketel wat besig was om te kook en die ontblote kabels kragloos gelaat. Dit het ook ʼn alarm by ons plaaslike gemeenskapspolisiëringforum (GPF) geaktiveer.”

Mike Bonnette. Foto: Verskaf

Die man het daarna die koord en muurprop om sy hand gedraai en Bonnette erg daarmee aangerand. Die aanvaller het sy makkers opdrag gegee om die “kookwater” te gaan haal, maar dit was net lou toe hulle dit oor Bonnette uitgooi.

“Die Here het van die begin af sy hand oor my gehou en wonderwerk ná wonderwerk het gebeur. Hulle het my daarna na die badkamer toe gedwing waar die kort man my wou skiet. Hy het die ammunisie vir my gewys. Hy het vir die ander twee gesê om weg te gaan, want hy wou nie hê hulle moet sien hoe hy die ‘white bastard’ skiet nie.”

Die ander twee aanvallers was besig om huisware in Bonnette se bakkie in te laai toe Bonnette se kleindogter se swart poedel begin het om aanhoudend te blaf. “Ek het vir die kort man gesê die GPF is hier en dit het hulle die skrik op die lyf gejaag. In daai selfde stadium het daar wel ʼn lid van die GPF opgedaag en die mans het met my bakkie op die vlug geslaan.”

Die aanvallers is weg met die egpaar en van die werkers se spaargeld, juwele, ʼn selfoon en ander waardevolle besittings.

Bonnette het verskeie hoofbeserings opgedoen en is deur Netcare 911 na die hospitaal gehaas. Hy het ook beserings aan sy been, skouers, nek, arm en rug opgedoen.

Sy bakkie is Maandag in die vroeë oggendure deur die GPF verlate naby ʼn treinstasie opgespoor.

Die polisiewoordvoerders kon sedert Vrydag nie vir kommentaar bereik word nie. Volgens Bonnette is niemand nog in verband met die voorval in hegtenis geneem nie. Hy het gesê een van die aanvallers het ʼn klapmus aangehad, die ander twee herken hy glad nie. Hy skat hulle in hul middel 30’s.

Bonnette het in die 1980’s ʼn sendelingskool in die omgewing oorgeneem, wat nou sowat 300 leerders en ʼn kerkie huisves. Sy plaas verskaf werk aan vele werkers. Hy het gesê hy dra nie haat of wrede gevoelens ná die voorval nie, maar sal wil hê dat die booswigte aangekeer word sodat geregtigheid kan geskied.

Kobus Hoffman, die VF Plus-onderleier in Gauteng en raadslid in Sedibeng-munisipaliteit, het die grusame aanval veroordeel. “Die slagoffer is ʼn boer wat onder meer op eie koste ʼn skool vir plaaslike minder bevoorregte kinders laat bou het en heelwat opheffingswerk onder die gemeenskap gedoen het,” het Hoffman gesê. “Dit is uiters betreurenswaardig dat juis só ʼn gemeenskapsaktivis en bydraer van liefdadigheid die teiken van sulke dade geword het. Dit is ʼn duidelike teken dat niks en niemand meer ontsien word nie.”

Volgens Hoffman is dit ʼn wonderwerk dat Bonnette die aanval oorleef het. “Hierdie lafhartige daad word direk toegeskryf aan die openbare aanhitsing tot geweld, haatspraak en rassehaat deur veral politici. Die VF Plus sal onverpoosd voortgaan om plaasaanvalle te internasionaliseer en onder die wêreld se aandag te bring, totdat daar daadwerklik deur die internasionale gemeenskap hierteen opgetree word.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

59 Kommentare

jongste oudste gewildste
Hanna

En dan reken die hooggeplaastes dat plaasaanvalle niks met ras uit te waai het nie… Gaan vertel dit vir die man in die maan! Dis haatmisdade hierdie. Punt.

ferdi

Alles te danke aan Mallelema hoop Agri Forum en die gebed va di regverdiges word beantwoord

Al

Ek stem en ek sê nog steeds daar is politieke magte wat terreur en vrees onder wit mense wil injaag.

Hennie

Ons kan weer vra: Is Australie verkeerd??

Duitser

Julle moet die plaasaanvalle getalle by sit ,elke dag lees ek van aanvalle maar hoeveel was daar al tot vandag.?
??