Wysiging aan vuurwapenwet: E-pos-dilemma maak openbare stem stil

Argieffoto ter illustrasie

Die e-posadres waarna lede van die publiek hul kommentaar oor die Wysigingswetsontwerp oor Vuurwapenbeheer moet stuur, ondervind afleweringsfoute.

Maroela Media het verlede week berig lede van die publiek word versoek om kommentaar te lewer oor die Wysigingswetsontwerp oor Vuurwapenbeheer waarvolgens lisensies vir vuurwapens onder meer nie vir selfverdediging uitgereik mag word nie.

Vrystaat Landbou (VL) sê egter nou verskeie mislukkings om klagtes te lewer het intussen onder sy aandag gekom. Die organisasie het reeds ʼn brief aan die sekretaris van die polisie gestuur waarin hy sy kommer oor die kwessie uitspreek.

Die prokureursgroep MJ Hood & Associates het ook ʼn brief aan die sekretaris van die polisie gestuur rakende die elektroniese afleweringsfoute.

Francois Wilken, president van VL, sê elektroniese insette bied tans die belangrikste openbare kommunikasiekanaal aangesien die land hom nog in die greep van die nasionale ramptoestand bevind.

“Die huidige situasie ondermyn die hele proses,” verduidelik hy.

VL hou vol die wetsontwerp laat die landelike en landbougemeenskap ernstig blootgestel.

Die organisasie sê hy sal dus, indien nodig, persoonlik kommentaar lewer op die Wysigingswetsontwerp oor Vuurwapenbeheer indien sy lede weens tegnologie-struikelblokke verhoed word om dit te doen.

VL het intussen ʼn skakel vir dié doel op sy webwerf beskikbaar gestel. Lede van die publiek kan dit voltooi om te verseker dat diegene wat teen die wetsontwerp gekant is se stem wel gehoor word. Die voorleggings sal deur VL by die sekretariaat van die polisie ingedien word.

“Ons moet toesien dat die openbare stem hieroor geensins geïgnoreer word nie,” sê Wilken.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

25 Kommentare

jongste oudste gewildste
Persheks Adri

Hoe gerieflik en kon dit verwag het! Dankie VL ons almal waardeer dit opreg en is besig met die wysiging op die wet punt vir punt met feite natuurlik sodat ons teen elke 1 kan kommentaar lewer en bietjie breinselle skud! Ons stemme moet beslis gehoor word!

Pieter

Anc sabotasie dit is al wat dit is.

Pierre

Hoekom is ek nie eers verbaas nie…

Gert

Die vl se skakel werk nie this site could not be reached ip adress not found

Stephan

Nou HOE het hulle hul brief gestuur? Per e-Pos, of per poskantoor (wat toegemaak het)? Dalk per mikstok?