Wysiging voorgestel: Geen vuurwapens vir selfverdediging

Skermskoot uit die Wysigingswetsontwerp op Vuurwapenbeheer wat in die Staatskoerant van 21 Mei 2021 gepubliseer is

Die publiek word versoek om kommentaar te lewer oor die Wysigingswetsontwerp oor Vuurwapenbeheer waarvolgens lisensies vir vuurwapens, onder andere, nie vir selfverdedigingsredes uitgereik mag word nie.

Die Wysigingswetsontwerp is Vrydag in die Staatskoerant gepubliseer. Die Wysigingswetsontwerp stel voor dat die wet gewysig word sodat “die aansoeker ʼn geldige rede moet verskaf vir die besit van ʼn vuurwapen en sodat geen vuurwapenlisensie uitgereik sal word vir selfverdedigingsredes nie”, lui die voorstel.

Dr. Pieter Groenewald, leier van die VF Plus, het Saterdag gesê die voorstel dat die besit van vuurwapens vir selfverdediging as kategorie geskrap moet word sal Suid-Afrikaanse burgers kwesbaar laat teen misdaad, en ʼn paradys skep vir misdadigers.

“Met ʼn moordsyfer vyf keer hoër as die wêreldgemiddeld (7/100 000 – wêreld en SA – 36/100 000) en die omvang van roof en plaasaanvalle, is dit noodsaaklik dat burgers vuurwapens moet kan besit om hulself te verdedig,” het Groenewald bygevoeg.

Hy sê die probleme in die polisie en die onvermoë om misdadigers suksesvol te vervolg, dien as bewys dat die staat nie die burgers behoorlik teen misdadigers kan beskerm nie. “Hierdie voorstel is ʼn klap in die gesig van wettige vuurwapeneienaars en die burgery. Dit is duidelik dat die minister van polisie, Bheki Cele, die blaam vir sy eie onvermoë van behoorlike en effektiewe vuurwapenbeheer deur die Sentrale Vuurwapenregister (SVR), na wettige vuurwapeneienaars wil verskuif.”

Die minister het reeds in 2018 in die parlement oor die aangeleentheid gereageer op ʼn amptelike vraag van dr. Pieter Groenewald, leier van die VF Plus.

Op ʼn vraag van dr. Groenewald of die minister van voorneme is om die kategorie om ʼn vuurwapen vir selfverdediging te besit te laat verwyder, het die minister geantwoord deur te sê dat hierdie kategorie strenger gemaak gaan word. Die minister het as rede aangevoer dat hy die toename in onwettige vuurwapenbesit wil verminder.

“Hierdie rede getuig van onkunde deur die minister. Onwettige vuurwapens neem toe weens onwettige wapenhandel, diefstal by polisiekantore en swak bestuur van die SVR. Met die skrapping van die kategorie vir selfverdediging, maak die minister die bepalings nie strenger nie, hy verbied dit in effek.”

Groenewald sê die jongste misdaadsyfers is ʼn bewys dat die polisie misdaad, en veral geweldsmisdaad, nie onder beheer het nie en dus faal in sy grondwetlike plig om die mense van Suid-Afrika en hul besittings te beskerm.

“Indien die staat jou nie kan beskerm nie, het jy die volste reg om jou en jou gesin met al die moontlike middels te beskerm, insluitend die besit van ʼn vuurwapen ter selfverdediging. Dit is ook ʼn gemeenregtelike reg wat elkeen het. Die regering moet ophou om homself te mislei deur die indruk te wil skep dat vuurwapens die oorsaak is van die hoë moordsyfer in Suid-Afrika. Hierdie bewering word misbruik en die regering gebruik dit as rookskerm om sy eie onbevoegdheid te verbloem.”

Hy meen die ontwapening van die burgery sal misdadigers bevoordeel en misdaad bevorder wat dramaties sal toeneem.

“Die VF Plus sal alles in sy vermoë doen om die reg van selfverdediging deur die gebruik van vuurwapens te verdedig en te verseker,” het Groenewald bygevoeg.

 

Enigiemand wat kommentaar wil lewer word versoek om binne 45 dae van die datum van publikasie (21 Mei 2021) van die Staatskoerant skriftelik te reageer:

Secretary for Police Service
For attention of Mr M Ntwana
Private Bag x922
PRETORIA
0001

  • per hand ingedien by die Burgerlike Sekretariaat vir die Polisiediens

Van Erkom-gebou
Van Erkom-arkade
7de verdieping
Pretoriusstraat 217
Pretoria

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

65 Kommentare

jongste oudste gewildste
Charlotta

So jy mag jouself nie verdedig nie. Die inbreker of ou wat moord wil pleeg, mag n vuurwapen hê. “Om homself te verdedig” Geld dit nou net vir die blankes???

Barend

Kyk maar vir iets amders wat nou ook deurgedruk behoort te word waarna niemand kyk nie.

Alma

Dis nou die mees belaglikste idee waarmee hulle nog uitgekom het… Waarmee moet jy nou jouself beskerm? So as jy hom nou skiet as HY in JOU huis inkom en jou bedreig met SY onwettig wapen moet jy hom nou aanvat met jou hande? En as jy hom skiet gaan jy seker sit vir moord. Wow, ek kan dit nie begryp nie.

Tipper

kry dan mechete

Persheks Adri

Hoedeman jy krap nou waar dit nie jeuk nie! Ons eerlike burgers is meer as bekwaam as jy en jou mense voetsek man!!!