Xander Bylsma dié week gevonnis

Xander Bylsma gedurende ‘n vorige hofverskyning. (Foto: Tania Heyns/Maroela Media)

Xander Bylsma (21) sal na verwagting vandeesweek gevonnis word in die opspraakwekkende Stella-moordsaak.

Vonnisoplegging is vir Woensdag tot Vrydag in die hooggeregshof in Mmabatho in Noordwes op die hofrol geplaas.

Vonnisoplegging is in Mei weens die Covid-19-pandemie uitgestel nadat Bylsma (21) in Februarie skuldig bevind is aan die moord op sy voormalige vriendin Sharnelle Hough en haar boesemvriendin Marna Engelbrecht.

Hough (17) en Engelbrecht (16) is gedurende die nag van 25 en 26 Mei 2018 in die hoërskoolkoshuis op Stella vermoor. Hough se liggaam is die oggend van 26 Mei aangetref waar sy met ’n tou om die nek aan ’n trapreling gehang het. Engelbrecht se liggaam is in ’n badkamer met ’n handsaklus om haar nek aangetref.

Maroela Media het vroeër berig regter Ronald Hendricks het in sy uitspraak gesê dit is duidelik uit die bewyse in die binne- sowel as die hoofverhoor dat dit Bylsma is wat die meisies vermoor het en nié Brandon Victor, Sharnelle se kêrel ten tyde van die moorde nie. Bylsma het tydens die verhoor beweer Victor is die skuldige.

“Die bewyse vertel ’n verhaal van gemengde gevoelens, jaloesie, teleurstelling en wraak,” het Hendricks gesê.

Volgens Hendricks was Sharnelle se moord haarfyn beplan en het Bylsma haar op só ’n wyse vermoor om die indruk te skep dat sy selfmoord gepleeg het. Hy het egter nié beplan om Marna die betrokke aand te vermoor nie.

“Marna was bloot op die verkeerde tyd op die verkeerde plek.”

Bylsma is tans in aanhouding in die Rooigrond-gevangenis.

Só het gebeure plaasgevind

Sharnelle Hough (17), links, en Marna Engelbrecht (16). Foto: Via Facebook

Bylsma was woedend omdat Sharnelle ʼn nuwe kêrel gehad het en het doelbewus beplan om haar in die vroeë oggendure in die koshuis te vermoor terwyl almal slaap. Hy het dus die aand eers na die feesterrein op die dorp gery waar hy ’n ruk lank gerook het, voordat hy Sharnelle ná middernag gebel en te voet koshuis toe gestap het.

Die hof het verder bevind dat Bylsma presies geweet het hoe om toegang tot die koshuis te kry en is by die koshuis in nadat Sharnelle se kêrel die oggend gaan slaap het. “Soos die noodlot dit wou hê was Marna egter ook in die koshuis,” het Hendricks gesê.

Volgens die hof het Bylsma vir Marna op pad badkamer toe aangetref, waarna hy haar agtervolg en verwurg het terwyl Sharnelle ’n warmer broek in die kamer gaan aantrek het. Hy het Marna se liggaam in die badkamer gelaat en uiteraard nie vir Sharnelle daarvan gesê nie. Hy het haar toe óók verwurg en van die trapreling laat afhang.

Dit is ook hy wat die halfnaakte foto’s na haar pa, Ronnie Hough, se selfoonnommer gestuur het.

Sharnelle Hough en Xander Bylsma. Foto: Facebook

Hendricks het tydens sy uitspraak benadruk dat Bylsma eers in die koshuis besluit het om vir Marna dood te maak sodat sy hom nie kon impliseer nie, nes die staat in sy argument aangevoer het. Dit is ook moontlik dat Bylsma haar vermoor het omdat sy nie ’n versoening tussen hom en Sharnelle goedgekeur het nie.

“Dit is vergesog, om die minste te sê, dat Victor die moorde gepleeg het,” het Hendricks gesê. Hy het … uitgewys dat Bylsma tydens die saak by verskeie geleenthede aan die hof bewys het dat hy ’n ongeloofwaardige getuie is en homself herhaaldelik weerspreek of met onwaarskynlikhede vorendag gekom het. Hy het ook die skuld op sy vorige regspan gepak wanneer dit hom pas.”

Volgens Hendricks was die staatsgetuies in die saak egter deurgaans geloofwaardig en eerlik.