Xander Bylsma vandag verder kruisondervra

Xander Bylsma in die hof. Foto: Mia Spies/eNuus

Die moordbeskuldigde Xander Bylsma (20) sal vandag in die hooggeregshof in Mmabatho verder kruisondervra word oor sy bekentenis wanneer die verhoor hervat.

Die verhoor is in Mei uitgestel nadat Bylsma se regspan aan die saak onttrek het. Dit was die tweede regspan wat aan die saak onttrek het. Bylsma se eerste prokureur het ook vroeër vanjaar weens ʼn vertrouensbreuk onttrek.

Bylsma word van die moord op sy eksmeisie, Sharnelle Hough (17), en haar boesemvriendin, Marna Engelbrecht (16), aangekla.

Bylsma het begin getuig toe die verhoor in Mei hervat het. ʼn Binneverhoor is tans aan die gang om te bepaal of ʼn bekentenis wat Bylsma in die bakkie op pad na die polisiestasie gemaak het, wat ook op band vasgevang is, as bewysstuk toegelaat mag word.

Sharnelle Hough (17), links, en Marna Engelbrecht (16). Foto: Via Facebook

Maroela Media het vroeër berig Bylsma se stem kan op die bandopname gehoor word waar hy aan die private speurder Chris Saunders sê Marna het die betrokke aand eerste gesterf, maar dat hy daarna nog wou probeer het om dinge tussen hom en Sharnelle uit te praat. In die bandopname verduidelik Bylsma hoe hy die nylontou om Sharnelle se nek gebind en haar by die trapreling laat afsak het.

“Ek het ʼn knoop gemaak om die trappe se ding. Toe ryg ek die tou deur en toe sit ek die tou om haar nek. Toe stamp ek haar af,” sê Bylsma in die bandopname. Later beweer hy egter Sharnelle wou nie meer lewe nie.

Sharnelle en Marna se liggame is op 26 Mei verlede jaar in hul koshuis by Hoërskool Stella in die Noordwes-dorpie aangetref. Sharnelle se liggaam het aan ʼn nylontou aan ʼn trapreling gehang, terwyl Marna se liggaam met ʼn handsakband om haar nek in die badkamer aangetref is. Albei is verwurg.

Bylsma is ure daarna in hegtenis geneem nadat Saunders hom na die polisiestasie op Vryburg geneem het.

Die saak word deur regter Ronald Hendricks aangehoor. Adv. Johan Smit SC kla aan.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

18 Kommentare

jongste oudste gewildste
Kobus

Hoekom sloer hierdie saak so. Families soek seker klaarheid .

WIEBO

Alles sloer so. Die howe stel net uit. Soos met die Dros verkragter saak, hoor niks meer daarvan nie, asook die rugbyspeler wat n ou aangerand het by Presley”s. Alles kom nie tot op n punt nie……………..

Martie

Geen versagting vir hom nie….daai twee meisiekinders se hele lewe het nog voorgele en hier kom die mannetjie en speel God. Laat hy maar sit. Sterkte aan die dogters se familie en ook aan syne. Ek is seker niemand maak hulle kind so groot nie

K

Tyd dat die mannetjie toegesluit word.

SjN

Hoekom sloer die saak so lank? mag die waarheid seevier sodat die betrokke families wat deur n moelike tyd gaan berustingkan kry.