Zille kap terug oor ‘skorsing’

Helen Zille

Helen Zille, voormalige leier van die DA en Wes-Kaapse premier, het Saterdag gesê die DA se federale uitvoerende komitee se besluit om haar te skors, strook nie met die party se eie federale grondwet nie.

Die DA het egter vinnig hierop gereageer deur nog ʼn verklaring uit te reik om die saak te verduidelik.

Dit volg nadat Mmusi Maimane, leier van die DA, vroeër Saterdag gesê het Zille is van alle DA-aktiwiteite geskors hangende die uitslag van ʼn dissiplinêre proses teen haar. Hy het gesê dit het vir hom duidelik geword dat hy en Zille se houdings oor wat die DA in 2019 moet bereik “grondliggend van mekaar verskil”. Volgens Maimane ondermyn Zille se kommentaar en openbare uitsprake oor kolonialisme die DA se versoeningsprojek en het haar optrede die DA se beeld skade berokken.

Zille het in ʼn verklaring wat sy op haar Twitter-profiel geplaas het, gesê die DA-grondwet vereis dat sy tyd gegee word om vertoë oor die kwessie te lewer. Sy het ook gesê daar is teenstrydighede in die brief wat deur James Selfe, die voorsitter van die DA se federale uitvoerende komitee, aan haar gestuur is en die verklaring wat deur Maimane gemaak is.

In die brief het Selfe haar tot 6 Junie gegee om redes te verskaf hoekom sy nié geskors moet word hangende die uitslag van haar dissiplinêre verhoor nie. Maimane het egter in sy verklaring dit duidelik gestel dat haar skorsing reeds van krag is.

Die DA se leierskap het Zille daarvan beskuldig dat sy die party se grondwet oortree het toe sy vroeër vanjaar in ʼn reeks twiets bevraagteken het of “elke aspek van kolonialisme sleg was”. Nadat Maimane ʼn klag teen Zille by die party ingedien het, het die party besluit dat sy dissiplinêr verhoor sal word.

Zille het Saterdag in haar verklaring gesê Maimane se bewering dat sy geweier het om vir haar optrede om verskoning te vra, is ook nie waar nie. “Ek het in die openbaar om verskoning gevra. Wat ek wel geweier het om te doen, is om skuld te erken op ʼn aanklag van wangedrag wat ek nooit gepleeg het nie,” het sy gesê.

“Ek is natuurlik bereid om ʼn volle dissiplinêre verhoor te ondergaan. Ek kan nie aanvaar dat die DA die reg het om my skuldig te bevind en my te straf nog voordat die verhoor plaasgevind het nie. Ek sal nie geboelie word om te bedank of myself te inkrimineer nie.”

Die DA het in ʼn opvolgverklaring gesê hy neem kennis daarvan dat die federale uitvoerende komitee vir Zille kennis gegee het “van sy voorneme om haar tydelik van party-aktiwiteite te skors” hangende die uitslag van die dissiplinêre proses wat teen haar aan die gang is.

“Ons het Helen Zille die geleentheid gegee om aan ons redes te verskaf hoekom sy nie geskors moet word nie. Die kennisgewing oor haar voorgenome skorsing is reeds aan haar gestuur en vereis dat sy haar vertoë binne 72 uur moet maak. Die finale besluit van die federale uitvoerende komitee sal geneem word sodra [Zille] haar redes verskaf het en dit oorweeg is,” het die verklaring gelui.

Lees alle vorige berigte oor Helen Zille op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

129 Kommentare

jongste oudste gewildste
GR

Ja ook maar net nog party wat swig voor anc se geskree,het meer van Maimane verwag maar helaas…..net nog ‘n bang party leier

Fc

DA = EFF. Begin eensydig te raak.

niccy

Tata DA! Julle is nou amper net soos die ANC. Hallo VF+. Het slegs vir DA gestem omrede die ander party so klein is maar stem in beginsel saam met VF+. Sal alle blankes beinvloed om in die toekems VF+ te stem. Pasop hier kom nog ‘n Nr.1.
Helen ons het nog steeds baie respek vir jou.

Robert

…..en so byt die makste hond die seerste…..

SHB

DA en Maimane het ook my stem verloor