Zoeloe-koning eis waarborge van Ramaphosa oor grondhervorming

Zoeloe-koning Goodwill Zwelithini (Foto: ANA)

Grond wat aan die Zoeloe-nasie behoort sal nie deur die nasionale regering onteien word nie, het die Zoeloe-koning Goodwill Zwelithini Sondag aan duisende persone gesê wat die jaarlikse Shakadag-vieringe in Durban bygewoon het.

Tydens sy jaarlikse toespraak het Zwelithini geëis dat pres. Cyril Ramaphosa hom weer moet besoek en waarborge moet gee dat die Ingonyama Trust nie geteiken sal word deur die land se grondhervormingsprogram nie.

Ramaphosa het die koning in Junie besoek en het opslae gemaak toe hy voor die koning gekniel het in sy amptelike paleis in Nongoma in die noorde van KwaZulu-Natal. Ramaphosa het later verduidelik hy het slegs gebuk om vir die koning ʼn boek oor beeste te wys.

Zwelithini het sy mening duidelik gemaak oor die landswye debat of die Grondwet verander moet word om dit vir die staat maklik te maak om grond sonder vergoeding te onteien. Sy woede spruit uit aanbevelings in ʼn verslag genaamd “High level panel on the assessment of key legislation and the acceleration of fundamental change”, onder leiding van voormalige president Kgalema Motlanthe en wat verlede jaar in November vrygestel is.

Volgens die verslag is die Ingonyama Trust waarskynlik ongrondwetlik en die bestaan daarvan moet hersien word in enige grondhervormingsdebat. Die verslag het ook bevraagteken waarom die trust slegs ʼn paar dienste verskaf aan diegene wat die grond beset, en tog ontvang die trust meer as R96 miljoen uit huurgeld.

Die trust besit ongeveer 29.67% van hoofsaaklik plattelandse grond in KwaZulu-Natal, ʼn gebied van 94 361 km². Alhoewel Zwelithini die enigste trustee van die grond is, is dit opgedeel in verskillende stamme onder toesig van tradisionele leiers.

Hy het die gehoor by die Moses Mabhida-stadion in isiZulu toegespreek en gesê Ramaphosa “moet na KwaZulu-Natal toe kom met iets in swart-op-wit om alle Zoeloes te verseker dat daar nie aan hulle grond geraak sal word nie”.

Die Shakadag-vieringe was vir 24 September geskeduleer, maar is uitgetel toe Zwelithini se seun, Butho Zulu, skielik gesterf het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

23 Kommentare

jongste oudste gewildste
GES

Ag nou toe nou. Die koning moet hom maar op sy knieë hou.

Johanna Botha

So maw hy wil eintlik se die reg moet hom beskerm maar nie die ander wat wel belasting betaal nie

Snowball

Die koning het gepraat, Ramparty beter luister. Hy sal swart op wit (no pun intended) moet gaan bewys dis net die wittes wat onteien gaan word. Maar nou lieg die prez so maklik, g’n wonder die koning se senuwees is klaar nie.

Lerato

Phil Molefe het deeglik navorsing gedoen, oor Neo-feudalisme in KZN.

Iets baie interessant om te Google.

Willem

Priester Ramaphosa gaan die keer dalk net ‘n knieknik maak soos vir die Engelse koningin, of dalk die kop knik, maar dit sal nou interessant wees om te sien of Mohammed weer na die berg toe sal gaan. Dalk maak hy net eenvoudig of hy die opdrag nie eens gehoor het nie. Dis mos nie sy koning wat beveel het nie.