Zondo kap Sisulu oor meningstuk

Lindiwe Sisulu. (Foto: @DWS_RSA
/Twitter)

Die minister van toerisme, Lindiwe Sisulu, se meningstuk oor die Suid-Afrikaanse regstelsel is ’n aanval op alle swart regters.

Só het waarnemende regter Raymond Zondo Woensdagmiddag tydens ’n aanlyn mediakonferensie gesê. Zondo het gereageer op Sisulu se meningstuk wat verlede Vrydag op Independent Online gepubliseer is. In dié meningstuk het sy aangevoer die oppergesag van die reg dien nie Afrika-waardes en -belange nie.

Zondo het Sisulu se mening as “ongegrond” beskryf en gesê dit is heeltemal “ongevraagd”.

“Ons as die regbank het nog nooit gesê dat ons nie gekritiseer mag word nie. Ons aanvaar dat ons gekritiseer mag word, maar dit moet regverdig wees en moet behoorlike feitelike basis hê,” het Zondo gesê.

“Dit is ʼn belediging vir die regters van die Konstitusionele Hof, regters van die hoogste hof van appèl, dié in die hoërhowe en alle Afrika-regters. Die meningstuk is deurspek van beledigings, maar daar is geen stawing van menings met feite nie. Ek glo nie Sisulu het enige feite nie.”

Zondo het gesê dit is veral betreurenswaardig dat hierdie beledigings van ’n senior lid van die ANC, parlement en die uitvoerende gesag gekom het.

Die DA het ʼn beroep op pres. Cyril Ramaphosa gedoen om Sisulu opdrag te gee om die meningstuk terug te trek en ʼn openbare verskoning uit te reik vir die ondermyning van die regbank en die belediging van die integriteit daarvan. Volgens die party het Sisulu ʼn parlementêre gedragskode oortree.

Volgens die DA-leier John Steenhuisen het Ramaphosa – selfs al is geen formele bevinding van oortreding op Sisulu se uitlatings gemaak nie – ʼn verpligting om openbare vertroue in die grondwetlike integriteit van ander vertakkings van die regering te beskerm.

Die DA het verder ʼn beroep op die minister gedoen om voor die parlement se etiekkomitee te verskyn waar sy gevra sal word om te verduidelik hoe sy, as ʼn parlementslid, haar aanval op die regbank met die parlementêre gedragskode versoen.

“Hierdie kode bepaal onder meer dat lede ‘ten alle tye optree in ooreenstemming met die openbare vertroue wat in hulle geplaas word’. Dit eis ook van lede dat hulle ‘hul verpligtinge ingevolge die Grondwet teenoor die parlement en die breë publiek nakom deur die openbare belang bo hul eie belange te plaas’ en dat hulle ‘openbare vertroue en vertroue in die integriteit van die parlement moet skep, en sodoende die respek en vertroue wat die samelewing in die parlement as verteenwoordigende instelling moet hê’,” sê Steenhuisen.

“As ʼn sittende lid van die nasionale hoofbestuur, het Sisulu eerstens die uitvoerende etiese kode oortree deur gedrag wat strydig is met haar rol as ʼn kabinetsminister, en verder die beginsel van skeiding van magte tussen die uitvoerende gesag en regbank oortree deur te insinueer dat lede van die regbank die wet verkeerd interpreteer om gevestigde agendas na te streef.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

38 Kommentare

jongste oudste gewildste
Shakespeare

Ek weet nie wat kader Sisulu gesê het in die skrywe nie maar ek persoonlik dink daar is R400m gemors want daar gaan niks van kom nie. Krimineel bandiet Zuma gaan nog n enorme staatsbegrafnis ook kry en voor dit nie n enkele dag in die tronk wees nie.

Casper

Was sy nie by water en sanitasie ook die minister wat die Kubane ingevoer het nie.Vrotsig verby.Oral waar sy gaan verander dinge in ‘n fiasko.

Hannes

Dit gaan my verstand te bowe dat die mense wat vir “equal rights” baklei het voel hulle verdien ‘n ander stel reëls wat hulle pas. Haar definisie van “Afrika-waardes en-belange” kan seker net beteken “ All animals are equal, but some animals are more equal than others.”

FranWilder

Klomp narre, almal van hulle

Tubac

Altyd geweet sy is van lotjie getik.