Zuma agter tralies

Oudpres. Jacob Zuma is nou ’n gevangene van die Estcourt-gevangenis in KwaZulu-Natal. (Foto: Emmanuel Croset/AFP)

Oudpres. Jacob Zuma is nou ’n gevangene van die Estcourt-gevangenis in KwaZulu-Natal.

Dít is Donderdag in ’n verklaring deur die departement van korrektiewe dienste bevestig.

Die Jacob Zuma-stigting asook Duduzile Zuma, Zuma se dogter, het Woensdagaand op Twitter aangekondig dat die voormalige staatshoof hom kort voor middernag aan die polisie oorgegee het om sy 15 maande vonnis te begin uitdien.

Die Konstitusionele Hof het Zuma tot Sondag tyd gegee om hom aan te meld om sy tronkstraf te begin uitdien wat aan hom opgelê is vir die minagting van ’n hofbevel om voor die Zondo-kommissie na staatskaping te getuig.

Sou hy versuim, het die hof gelas dat die polisie hom teen Woensdag in hegtenis moet neem.

Luidens berigte en video’s wat Woensdagaand op sosiale media gedeel is, was daar ’n swaar polisieteenwoordigheid by Zuma se Nkandla-woning terwyl hy die perseel verlaat het.

Duduzile het getwiet dat sy met Zuma op pad na sy bestemming gepraat het en dat sy gemoedere ten tyde van die gesprek goed was.

“Hy sê hy hoop hulle het steeds dieselfde oorpakke van Robbeneiland en ons het gelag oor hy ten minste nie dié keer met Afrikaans sal sukkel nie. Ons salueer ons pa. Amandla.”

Duduzile het ook op Twitter gesê dat haar pa nie bang is om tronk toe te gaan nie aangesien hy al voorheen daar was.

“Al wat hy wou hê, was om te vermy dat daar bloed gestort word.”

Luidens die departement se verklaring sal Zuma aan al die voorgeskrewe regulasies soos deur die departement uiteengesit, onderwerp word.

“Alle ander toepaslike voorskrifte rakende die inneem en oriëntering van nuwe gevangenes sal ook nagekom en uitgevoer word.”

Die Vryheidsfront Plus sê hy beskou die jongste verwikkelinge as ’n oorwinning vir die polisie en Suid-Afrikaanse regstelsel.

“Zuma gee oor, want hy besef hy het sy politieke mag verloor. Al die bravade en dreigemente was net magsvertoon wat swig voor die oomblik van waarheid.

“Die vraag is steeds of hy tronk toe gestuur gaan word om sy vonnis uit te dien en, indien wel, of hy spesiale behandeling gaan kry. Siektetoestande sal waarskynlik ’n rede wees om hom in die hospitaal te laat opneem.”

Die party meen verder Zuma sal nou “martelaar speel” om simpatie te probeer wen.

Intussen het Zuma se regspan sedert die hofuitspraak behoorlik bontgestaan om te probeer keer dat Zuma vandeesweek tronk toe gaan.

Zuma het twee afsonderlike aansoeke by onderskeidelik die hooggeregshof in Pietermaritzburg en die Konstitusionele Hof ingedien om die lasbrief vir sy inhegtenisneming asook sy skuldigbevinding en vonnis ter syde te stel.

Die hooggeregshof het Dinsdag gesê dat uitspraak rakende die tersydestelling van die lasbrief tot Vrydag voorbehou is terwyl die Konstitusionele Hof ingestem het om Zuma se dringende aansoek vir die tersydestelling van sy skuldigbevinding en vonnis op Maandag 12 Julie aan te hoor.

Zuma voer in sy aansoek aan dat hy nie ’n geleentheid gegun is om getuienis ter versagting van sy vonnis te lewer nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

123 Kommentare

jongste oudste gewildste
Tubac

You can bluff some of the people some of the time, but you cannot bluff all the people all the time. Wat n klug!

Pietertjie

Kwalifiseer hy nie al om weens goeie gedrag op parool vrygelaat te word nie?

Tiptol

Uiteindelik ‘n stap in die regte rigting. Hoop dit sal so voortgaan.

Piet parys

Gevangene groot grap . 5 ster diens vir n BBP. Nie oorgegee nie maar moes mos inhegtenis geneem word na Sondag aand 12 uur was die opdrag .

Coolbanana

Dis n goeie dag vi SA……… Maar dis nog nie verby nie…… Sal sekerlik mediese parool kry?