Zuma bring dringende aansoek in hooggeregshof

Oudpres. Jacob Zuma het Vrydag ʼn dringende aansoek in die hooggeregshof in Pietermaritzburg gebring. (Foto: PHILL MAGAKOE/AFP)

Oudpres. Jacob Zuma het Vrydag ʼn dringende aansoek in die hooggeregshof in Pietermaritzburg gebring waarin hy die Konstitusionele Hof vra om die uitdien van sy vonnis, wat Dinsdag deur dié hof opgelê is, uit te stel.

Maroela Media het vroeër berig dat die land se hoogste hof die voormalige staatshoof Dinsdag tot 15 maande tronkstraf gevonnis het vir minagting van ’n hofbevel om voor die Zondo-kommissie na staatskaping te getuig.

Zuma sal sy vonnis na verwagting by die Westville-gevangenis in KwaZulu-Natal uitdien.

Carl Niehaus, woordvoerder van die Umkonto weSizwe-militêreveteranevereniging (MKMVA) en ander Zuma-ondersteuners tydens ’n mediakonferensie Vrydag by Nkandla. (Foto: Twitter)

In ’n meerderheidsuitspraak het regters bevind Zuma moet hom teen Sondag by die Nkandla- of Johannesburg-Sentraal-polisie aanmeld om sy vonnis te begin uitdien.

Luidens hofdokumente dien Zuma sy aansoek ingevolge reël 42 van die hofreëls in, wat volgens hom ook betrekking het op reël 29 van die Konstitusionele Hof se reëls.

Reël 42 bepaal onder meer dat die hof die reg het om vonnisse te wysig of te herroep.

Intussen neem steun vir die oudpresident by sy woning in Nkandla toe.

Carl Niehaus, woordvoerder van die Umkonto weSizwe-militêreveteranevereniging (MKMVA) het Vrydag tydens ’n konferensie in Nkandla gesê dat Suid-Afrika deur groot geweld in die gesig gestaar sal word indien Zuma tronk toe gaan.

Niehaus, wat die media by dié geleentheid toegespreek het, het gesê dat die MKMVA die ANC gewaarsku het dat daar ernstige gevolge sal wees indien Zuma toegesluit word.

“Ons land sal uitmekaar geskeur word. Daar sal onstabiliteit en oproer wees,” het Niehaus tydens die konferensie gesê.

Niehaus het ook gesê dat die Zondo-kommissie ingestel is om Zuma te “teiken”.

Intussen word video’s en foto’s op sosiale media versprei wat wys hoe honderde Zuma-ondersteuners buite sy Nkandla-woning saamkom – ongeag die vlak 4-inperkingsmaatreëls wat Sondag deur pres. Cyril Ramaphosa aangekondig is.

Luidens berigte is skote ook Vrydag deur mense in dié skare afgevuur en is padblokkades opgerig om die situasie te monitor.

Ian Cameron, hoof van gemeenskapsveiligheid by die organisasie Safe Citizen, sê benewens die gevare wat dié skietery vir ander mense inhou, is dit ’n oortreding van die Wet op Vuurwapenbeheer.

“Terwyl wetsgehoorsame burgers deur die polisie geteiken word om hulle te ontwapen, vuur ondersteuners van Zuma skote in die lug af. Tog lyk dit of die polisie bereid is om hierdie kriminele optrede te aanvaar.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

27 Kommentare

jongste oudste gewildste
Martie Smartie

En Cele gaan niks doen nie want hy is self n papbroek. Toe Cyril wat gaan jy nou doen? En Carl Niehaus, kry n lewe my maat, jy is soooooooo n has been, as jy aksie soek gaan gym of iets man of spit in die tuin, hoop die DA / Solidariteit le klagtes teen jou

annie

…. Zoeloe-regiment wagtend op ‘n tradisionele oorlog op die teken van veldmaarskalk Nie-Huis na sy uurlange toespraak op ‘n SABC-nuuskanaal… ter ere van steeds-die-president-Zuma-steeds-nie-sy-kans-in-die-hof-gekry-nie. Lees gerus weer De Klerk se roman Die Uur van Verlange. Dalk is die oplossing daarin vasgevang, hoewel ek niks beloof nie….

Snowball

‘n Uitgediende Niehaus belowe/beplan ‘n skeuring in SA. Wie gaan skeur van wat af? Die korrupste van die korruptes word vereer deur ‘n knopkierie- bende en hulle gaan hom ‘verdedig’ en uit die tronk hou deur sy arrestasie te verhoed – klink mos soos terrorisme en hoogverraad!
Waarnatoe lei dit? Nog ‘n Boipatong of ‘n Marikana? Interessant hoe Mabuza en Ramaphosa beide landuit is.
Cele, tyd om die albasters te poets en daai hoedjie vas te druk op die koppie , dinge kan rof raak. Of so belowe Camo Carl…

Stephan

Die Konstitusionele Hof het tog uitdruklik gesê dat hulle nie sal afwyk van hul beslissing nie.
Zuma speel nou vir tyd, dis duidelik…en so wil hy hierdie saak uitrek tot die maksimum.
Dis tyd dat Zuma begin luister (hy hét immers twee ore), en minder praat. Hy het genoeg geleentheid gehad, en dit vermors met emosionele uitsprake en/of optrede/aksies. Die wiel van die reg het gedraai, dis sy plig om nou aan te meld.
(Het hy nie vol bravade gesê dat hy eerder tronk toe sal gaan nie? So: “Put your money where your mouth is”.)

Anton J

Mnr Zuma het dan gesê hy is nie bang vir die tronk nie, hy gaan eerder tronk toe voordat hy getuig voor Zondo. So nou wil hy die uitspraak en vonnis beveg. Hy het nog voor enige uitspraak geweet wat gaan sy voorland wees of het hy gedink dit sal/kan nie met hom gebeur nie. Jy is ‘n skande vir ons…… Gaan sit en leer jou les oom Zuma.