Zuma dalk binnekort in hof

Oudpres. Jacob Zuma. Foto: Kopano Tlape/GCIS

Die Valke sal oudpres. Jacob Zuma na verwagting vandeesweek dagvaar om in die Durbanse hooggeregshof te verskyn op aanklagte van korrupsie.

Dit volg nadat Shaun Abrahams, hoof van die Nasionale Vervolgingsgesag (NVG), op 16 Maart aangekondig het Zuma sal verhoor word op aanklagte van korrupsie, geldwassery en rampokkery.

Abrahams het destyds aangekondig dat Zuma wel in die hof sal moet verskyn. Daar bestaan ook ʼn redelike kans dat vervolging suksesvol sal wees.

Hy het verwys na die lang geskiedenis van die saak wat reeds in 2007 begin het, ná ʼn ondersoek oor ʼn multimiljoenrand-wapenooreenkoms. Volgens hom het byna elke direkteur en adjunkdirekteur van openbare vervolging dié saak al onder oë gehad.

Wat betref die dokumente wat hy van Zuma ontvang het waarom hy nie vervolg moet word nie, het Abrahams ʼn span kenners aangestel om deur die bewysstukke te werk en hom van raad te bedien of aanklagte teen Zuma ingestel moet word of nie.

Daar is 16 hoofaanklagte oor 783 beweerde voorvalle van korrupsie (2), bedrog (12), geldwassery (1) en rampokkery (1) wat weer teen Zuma ingestel sal word.

Mokotedi Mpshe, destydse hoof van die NVG, het in April 2009 besluit om Zuma, toe net ANC-president, nie te vervolg nie. Zuma is die maand daarna as president van die land ingehuldig. Op 13 Oktober 2017 het die hoogste hof van appèl egter bevind Mpshe se besluit, om Zuma nie te vervolg nie, was irrasioneel en onredelik. Zuma moes daarna die NVG van redes bedien waarom die klagtes nie weer teen hom ingestel moet word nie. Zuma het einde Januarie dokumente by die NVG ingedien oor hoekom hy nié vervolg moet word nie. Die aanvanklike sperdatum vir dié vertoë was 30 November 2017, maar Zuma is uitstel van sewe weke toegeken.

Volgens berigte in Sondagkoerante sal Zuma waarskynlik op 6 April in die hof verskyn.

Brig. Hangwani Mulaudzi, woordvoerder van die Valke, het gesê die dagvaarding sal dié week op Zuma beteken word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

17 Kommentare

jongste oudste gewildste
Eish

Ek wonder hoekom n span kenners aangestel is om deur die bewys stukke te werk en Abrahams met raad te bedien?
As hoof van die NVG behoort hy self n kenner te wees met voldoende kapasiteit in die department om die besluit self te kan neem.

SjN

Speel vir tyd, wonder of hy nog so lekker gaan lag oor die uitspreek van nkandla,

Hannelie

As ek ou Zuma is….dan maak ek soos ‘n volstruis, druk my kop in ‘n gat en kom nooit weer daar uit nie. Hy is ook een van daai wat gedink het hy is “untouchable”.

Kaspaas

@Eish – Ek stem saam, en saam met dit, wonder Ek ook wat Zuma se redes sou wees, hoekom hy nie vervolg moet word nie?

E.K. die eerste

Gaan hier ooit iets van kom? Daar gaan dalk allerhande “foutjies” met die hele storie wees en hof gaan dit uitgooi…Ek is maar sinies oor die hele storie.