Zuma en kie aangekla na staatskaping-verslag

Pres. Jacob Zuma. Foto: Flickr/Governmentza/GCIS

Pres. Jacob Zuma. Foto: Flickr/Governmentza/GCIS

Strafregtelike aanklagte sal teen pres. Jacob Zuma en ander individue, wat in die openbare beskermer se staatskaping-verslag genoem word, ingedien word.

Die DA en AfriForum het albei Donderdag aangekondig hulle sal klagtes by ʼn polisiestasie indien teen onder meer pres. Zuma, sy seun, Duduzane Zuma en lede van die Gupta-familie.

Die DA het Donderdag gesê die staatskaping-verslag het bevestig wat talle Suid-Afrikaners alreeds weet en dit is dat die regering deur ʼn “mafia” beheer word.

“[Die regering word beheer deur] ʼn kriminele sindikaat wat so diep verweef is met private makkers se belange, dat dit nie langer moontlik is om tussen die twee te onderskei nie. Die mafia steel van die armes en keer geleenthede weg van hardwerkende Suid-Afrikaners na diegene wat ons president in hul sak het: ʼn welgestelde paar individue met goeie kontakte wat glad nie omgee vir die 8.9 miljoen werklose Suid-Afrikaners en die vernietigende ongelykheid in ons land nie,” het Mmusi Maimane, DA-leier, in ʼn verklaring gesê.

“Daar moet gevolge wees vir sulke optrede. Dit kan nie maar net sake soos gewoonlik wees, met oneerlike lippediens en selektiewe opslae, wat in die nuussiklus verdwyn nie. Net een amptelike verklaring moes gisteraand van die presidensie af gekom het: ʼn volledige en onvoorwaardelike verskoning en ʼn aankondiging van sy onmiddellike bedanking.”

Maimane het gesê die DA het klaar ʼn mosie van wantroue in Zuma ingedien en het reeds bevestiging ontvang dat die mosie volgende Donderdag in die Nasionale Vergadering gedebatteer sal word.

Intussen sal die DA aanklagte teen Zuma indien in terme van die Wet op die Voorkoming en Bestryding van Korrupte Aktiwiteite. Die party sal ook aanklagte teen Lynne Brown, minister van openbare ondernemings, indien oor onreëlmatighede waarby Eskom glo betrokke was en teen Mosebenzi Zwane, minister van minerale hulpbronne, in verband met ʼn reis wat hy na Switserland onderneem het. Korrupsie-aanklagte sal ook teen Duduzane Zuma en lede van die Gupta-familie ingedien word.

AfriForum het nie onmiddellik Donderdag bekend gemaak teen wie die organisasie strafregtelike aanklagte sal indien nie, maar gesê dit sal teen “verskeie individue en instansies wat in die staatskapingsverslag genoem is” wees.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

32 Kommentare

jongste oudste gewildste
Sorika

Ag lekker man, lekker

marlene

Karma

marlene

Oneerlikheid haal jou altyd in. Die lewe werk so.

zoom zoom

Hoeveel jare gaan dit die sapd vat om die ondersoeke te doen???

Alida

Mooi so!