Zuma geopereer; nog prosedures wag

Oudpres. Jacob Zuma. (Foto: Emmanuel Croset/AFP)

Oudpres. Jacob Zuma het Saterdag ’n chirurgiese prosedure ondergaan en sal in die komende week nog prosedures ondergaan.

Só het Singabakho Nxumalo, woordvoerder van die departement van korrektiewe dienste (DKD), Sondagoggend gesê nadat Zuma op 6 Augustus in ’n hospitaal opgeneem is en daar sedertdien talle vrae oor sy gesondheid is.

“Die DKD kan nie in die stadium voorspel wanneer Zuma ontslaan sal word nie en tans is ons prioriteit om te verseker dat hy die beste moontlike sorg ontvang,” het Nxumalo gesê. “Ons doen ’n beroep op mense om nie te bespiegel oor Zuma se gesondheid nie en om mediese praktisyns die ruimte te gun om voort te gaan om gehalte gesondheidsorg aan hom te verskaf.”

Geen besonderhede is nog oor Zuma se presiese gesondheidstoestand bekend gemaak nie. Die oudpresident het op 8 Julie 15 maande tronkstraf begin uitdien weens die minagting van ’n hofbevel om voor die Zondo-kommissie na staatskaping te getuig.

Die #FreeJacobZuma-veldtog het Saterdag gesê hy is “in beginsel” daarteen gekant dat ʼn private dokter van die Nasionale Vervolgingsgesag (NVG) se keuse toegelaat mag word om die mediese verslag van die weermagdokter wat Zuma ondersoek het, te betwis.

Die veldtog sê dit is ongehoord om ʼn gewone burgerlike dokter aan te wys om die verslag van ʼn senior weermagdokter in twyfel te trek en beslis hoogs ongewoon.

Zuma moes Dinsdag in die hof verskyn het vir die korrupsiesaak wat met die land se omstrede wapenonderhandeling verband hou.

Die Jacob G. Zuma-stigting het intussen Saterdag ’n verklaring uitgereik oor die “vals nuus” wat versprei word rakende die presiese verloop van gebeure toe die oudpresident laataand op 7 Julie in hegtenis geneem is.

Dit kom na berigte dat Dudu Myeni, voormalige voorsitter van die SAL en een van Zuma se vertrouelinge, glo ter elfde uur die oudpresident oortuig het om hom oor te gee.

Die stigting meen daar steek egter geen waarheid hier in nie en dat die berigte ten doel het om Zuma uit te beeld as ’n “oortreder wat buitengewone oorreding vereis om die wet te respekteer, ondanks die ongrondwetlikheid van die hele vonnisproses”.

Mzwanele Manyi, woordvoerder van die stigting, het gesê Myeni het Zuma die betrokke aand gebel om vir hom terugvoer te gee rakende sy regspan se poging om sy inhegtenisneming uit te stel deur ’n dringende hofaansoek. Dié aansoek was nie suksesvol nie en volgens Manyi het Zuma toe besluit om hom oor te gee en hom nie teen inhegtenisname te verset nie aangesien dit “bloedvergieting soortgelyk aan die Marikana-slagting” tot gevolg sou hê.

“Sy laaste woorde was: ‘Daar moet geen bloedvergieting in my naam wees nie’.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

39 Kommentare

jongste oudste gewildste
melaney

Zuma het al jare gelede die hele land in ‘n moerras verander. Hy moet nie nou witvoetjie soek nie.

Jeff

Blah blah blah. Wharra wharra wharra.

Eiervrug

Kom ek raai… Seker ‘n stopsel laat insit onder narkose…

Magda G

Ai altyd mediese probleme net om nie die opgelegde vonnis in die tronk deur te bring nie

Snowball

Ingroei toonnaels en vratte verg ook soms chirurgiese prosedures. Darem al te gemaklik om nie te spesifiseer wat fout is met die tronkvoël nie.