Zuma-hofsaak: ‘NVG se besluit was rasioneel’

Pres. Jacob Zuma. Foto: Ntswe Mokoena, departement van kommunikasie

Pres. Jacob Zuma. Foto: Ntswe Mokoena, departement van kommunikasie

Die presidensie het die besluit van die nasionale direkteur van openbare vervolging, op die vooraand van die hofsaak oor die nasionale vervolgingsgesag (NVG) se besluit om korrupsieaanklagte teen pres. Jacob Zuma te laat vaar, as “rasioneel” beskryf.

Die hooggeregshof in Pretoria sal Dinsdag die DA se aansoek begin aanhoor om die NVG se besluit om 738 aanklagte van bedrog, korrupsie en rampokkery teen Zuma te laat vaar, ter syde te stel. Die NVG het die besluit in April 2009 geneem.

“Die hofaansoek is al meedoënloos nagejaag oor ’n tydperk van sowat sewe jaar en streef daarna om die besluit van die direkteur van openbare vervolging ter syde te stel. Die president was nog altyd van mening dat die hofverrigtinge ’n misbruik van die proses is deur ’n politieke party om ’n politieke agenda te bevorder,” het die presidensie Maandagaand in ʼn verklaring gesê.

“Pres. Zuma sal deur middel van sy voorleggings aan die hooggeregshof volhou dat die besluit van die nasionale direkteur van openbare vervolging rasioneel afgelei is, soos blyk uit die bewyse wat aangevoer is, en dus enige ondersoek kan weerstaan.”

Die aanklagte het gespruit uit die wapentransaksie in 1999 en die besluit deur die destydse waarnemende hoof van die NVG, Mokotedi Mpshe, om die aanklagte te laat vaar. Zuma is kort hierna tot president verkies. Die DA het die hof genader om toegang tot die sogenaamde spioenasiebande te kry. Die opnames is sedert September 2014 in die DA se besit.

Die sogenaamde spioenasiebande is bandopnames van afgeluisterde gesprekke. Volgens Mpshe wys die bandopnames daarop dat die tydsberekening van die aanklagte teen Zuma deur ondersteuners van oudpres. Thabo Mbeki gemanipuleer is.

Lees alle vorige berigte hieroor op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

11 Kommentare

jongste oudste gewildste
NEL

Hoe verstaan ‘n mens die goed. Zuma was nog nie eens die president nie toe is hy al verhewe bo die gereg. 738 aanklagte teen hom van 1999 af en hy stap rond of niks met hom kan gebeur nie. Sal die spasie in 2099 dop hou en kan jou verseker daar sal niks van kom nie.

Griki

738 aanklagte en sal almal ‘n ondersoek weerstaan? Wat is die moontlikheid?

Oupa

Zuma kry dit vir baie lank al reg om die regsproses te frustreer, maar iets laat my dink sy tyd is besig om uit te loop: sy lakeie gaan nie vir altyd daar wees om hom te beskerm nie. Net jammer dat hy tot dusver die belastingbetalers se geld gebruik het daarvoor. Dít gaan ook uiteindelik opraak. Of die hofuitsprake na enige kant toe, enige positiewe invloed op die land gaan hê, is te betwyfel: die skade is klaar gedoen.

Voorlaaier

En ek klap i ou en word vir 9 maande tronk toe gestuur!!!!!
Ai! Die lewe is sooooo onregverdig!!!

HEVW

Ons wag maar. Daar bestaan baie selde so iets as lewenslank onaantasbaar, Dit is byna so iets as natuurwet. Kry dit selfs in die natuur dat selfs die sterkstes op n stadium uitgewerp word. Selfs die see maak hom van tyd tot tyd skoon. Sy kader- bastion wat hy vir homself opgebou het kan nog lelik boemerang. Ja selfs Julius Ceasar en PW. het dit pynlik ervaar.