Zuma kan nie ‘in tronk sit’ tot aansoek afgehandel is

Oudpres. Jacob Zuma se dringende aansoek word aanlyn aangehoor. (Foto: Emmanuel Croset/AFP)

Oudpres. Jacob Zuma se regspan het weereens Dinsdag aangevoer dat die hof se besluit om hom tronk toe te stuur, ongrondwetlik is en gesê dit is onregverdig dat Zuma in die tronk sit terwyl hy wag vir die hof om te besluit of die uitspraak omgekeer moet word.

Zuma se dringende aansoek om die lasbrief vir sy inhegtenisneming ter syde te laat stel, hangende sy aansoek vir die herroeping van sy vonnis in die Konstitusionele Hof, het Dinsdag kort na 12:00 in die hooggeregshof in Pietermaritzburg begin.

Adv. Dali Mpofu SC, namens Zuma, het bevraagteken waarom die kommissie na staatskaping, adjunkhoofregter Raymond Zondo, die kommissievoorsitter, asook die Helen Suzman-stigting die aansoek teenstaan, terwyl die polisie en die minister van polisie reeds aangedui het dat hulle dit nié doen nie.

Hy het eersgenoemde drie partye as ongenooid en bemoeisiek by die saak bestempel en gesê hulle het eintlik niks met die verrigtinge te doen nie.

“Teenkanting wat gegrond is op wraaksug om te sien dat Zuma vandag of môre gestraf word, is onvanpas om die minste te sê,” het Mpofu aangevoer.

Volgens hom is Zuma geen vlugrisiko nie en word hy deur die polisie bewaak. Hy het ook aan die hof gesê die kwessie het verstaanbaar heelwat belangstelling onder mense veroorsaak, gegewe die feit dat ʼn oudpresident betrokke is.

Regter Bhekisisa Mnguni het vandag verskeie vrae gehad oor of die hooggeregshof die jurisdiksie het om oor die kwessie te besluit – gesag wat Mpofu volhou die hooggeregshof wel het.

Mnguni wou ook weet waarom Zuma nie die Konstitusionele Hof direk genader het nie, veral omdat die hof ieder geval Maandag sy aansoek vir die herroeping van die vonnis aanhoor.

Mpofu het aangevoer net omdat nog ʼn hof jurisdiksie oor ʼn saak het – soos die Konstitusionele Hof – beteken nie dat ʼn applikant nie ʼn ander hof kan nader nie.

“Die enigste is vraag is of jy jurisdiksie het,” het Mpofu aan die hof gesê.

Hy voer voorts aan die bevel wat oorspronklik tot Zuma se tronkstraf gelei het, is ongrondwetlik en hou voet by stuk dat die tronkstraf sonder ʼn verhoor vir Zuma opgelê is.

Mpofu het aan die hof gevra of Zuma in die tronk moet sit tot sy aansoek in die Konstitusionele Hof afgehandel word en dan daarna, as die besluit herroep word, te sê “oeps, nou moet hy vrygelaat word”.

Adv. Tembeka Ngcukaitobi SC, namens die kommissie na staatskaping en adjunkhoofregter Raymond Zondo, het aan die hof gesê daar is ʼn voorgesette verpligting op Zuma om aan die hofbevel gehoor te gee en dat dit nie deur die huidige aansoek opgeskort is nie. “Sedert Sondag was Zuma in ʼn voortgesette verbreking van die huidige bevel,” voer Ngcukaitobi aan.

Ngcukaitobi sê hy is nie in die hof om oor die optrede van die polisie te praat nie, maar dat “Zuma aan die ander kant, op sy eie, letterlik die reg in eie hande geneem het. Dít op sigself behoort rede te wees om die aansoek van die hand te wys.”

Die verrigtinge sal na ʼn kort verdaging voortgesit word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

22 Kommentare

jongste oudste gewildste
Kokkie

“Zuma kan nie ‘in tronk sit’ tot aansoek afgehandel is” : Maar as die uitspraak nie in sy guns verloop nie, dan moet hierdie dae wat hy by die huis sit by sy vonnis gevoeg word.

Frik

“If the facts are on your side, Dershowitz says, pound the facts into the table. If the law is on your side, pound the law into the table. If neither the facts nor the law are on your side, pound the table” –
Mpofu & Zuma het daardie tafel nou al tot ‘n fyn poeier vergruis.

Androclus

Grootste krimineel daardie wat twak aanvang dan is hy bang vir die tronk-LAFAARD

Pieter

Interessant dat die ANC se letterlik en figuurlik swaargewigte altyd die EFF se Mpofu gebruik. Voëls van enerse vere.

agnes

Die regbank in SA is n draaibank