Zuma kondig kabinetskommeling aan

Pres. Jacob Zuma (Foto: GCIS)

Pres. Jacob Zuma het Vrydag in die vroeë oggendure ʼn kabinetskommeling aangekondig. Die ministers van finansies en polisie is onder meer hul poste kwyt.

Zuma het Donderdag laataand ʼn onverwagse vergadering met die ANC se top-ses leiers in Pretoria gehad waarna die kabinetskommeling in ʼn mediaverklaring aangekondig is.

Pravin Gordhan is afgedank as minister van finansies en Malusi Gigaba, minister van binnelandse sake, is in Gordhan se plek aangestel. Hlengiwe Mkhize neem by Gigaba oor.

Mcebisi Jonas, adjunkminister van finansies, is vervang deur Sfiso Buthelezi.

Fikile Mbalula, minister van sport, is die nuwe minister van polisie. Thulas Nxesi, minister van openbare werke, neem by Mbalula oor en Nathi Nhleko, voormalige minister van polisie, neem by Nxesi oor. Nkhensani Kubayi neem by Tina Joemat-Pettersson oor as die minister van energie. Joe Maswanganyi neem by Dipuo Peters oor as die nuwe minister van vervoer.

Derek Hanekom, minister van toerisme, word vervang deur Tokozile Xasa. Faith Muthambi, minister van kommunikasie, neem by Ngoako Ramatlhodi oor as minister van staatsdiens en administrasie. Ayanda Dlodlo is nou die minister van kommunikasie.

Volgens Zuma is die veranderinge gemaak om “doeltreffendheid en effektiwiteit” te verbeter. “Die veranderinge beteken daar is jonger LP’s en meer vroue sodat daar by hul energie, ondervinding en kundigheid gebaat kan word.”

Verskeie adjunkministers is ook hul poste kwyt of is geskuif. Die volgende veranderinge is gemaak:

Adjunkminister van staatsdiens en administrasie: Dipuo Letsatsi-Duba
Adjunkminister van openbare ondernemings: Ben Martins
Adjunkminister van kuns en kultuur: Maggie Sotyu
Adjunkminister van handel en nywerheid: Gratitude Magwanishe
Adjunkminister van kommunikasie: Thandi Mahambehlala
Adjunkminister van toerisme: Elizabeth Thabethe
Adjunkminister van polisie: Bongani Mkongi
Adjunkminister van telekommunikasie en die posdiens: Stella Ndabeni-Abrahams
Adjunkminister van kleinsakeondernemings: Nomathemba November

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

108 Kommentare

jongste oudste gewildste
Maryna

Minister van Sport nou Minster van Polisie… Komaan!!!! Wat het hy in sport gedoen???? O hemele… As ek geld gehad het was ek sommer NOU uit SA met my hele gesin…

My tweesent bydrae

Hoe het ons op hierdie punt gekom ?

Afrikaanse Knaap

Ek is net bly Fikile is weg by sport. Nou kan ek rugby weer geniet.

Ferdi

Die Nasionale Party

Chaparel

Mense dit is daadwerklik kommerwekkende nuus wat ek nou hier lees, wat word van ons eens so mooi Suid Afrika?