Zuma: ‘Korrupte amptenare sal vasgevat word’

Zuma kort na sy toespraak. Foto: ANC/Twitter

Zuma kort na sy toespraak. Foto: ANC/Twitter

ANC-president Jacob Zuma het Saterdag by die Nelson Mandelabaai-stadion in Port Elizabeth, tydens die regerende party se bekendstelling van sy verkiesingsmanifes, beloof korrupte regeringsamptenare sal vasgevat word.

“Molweni, Sanibonani, dumelang, thobela, good day, goeie dag!” het Zuma sy toespraak afgeskop. “Die ANC word gelei deur die Grondwet in alles wat hy doen om mense se lewensgehalte te verbeter.”

Volgens Zuma is die ANC se tema vir 2016 “die bevordering van mense se mag – plaaslike regering is in jou hande”. Hy het gesê die ANC het kennis geneem van mense se besware oor hoe raadslede in die verlede gekies is en dat gemeenskappe dus betrokke was by die kies van kandidate vir vanjaar se munisipale verkiesing.

Zuma het gesê korrupte ANC-beamptes sal verantwoording moet doen. “Die ANC sal munisipale beamptes en raadslede en hul onmiddellik familielede verhoed om sake met munisipaliteite te doen. Die ANC sal verseker aanbevelings wat volg op forensiese ondersoeke word geïmplementeer. Die ANC sal sorg  dat korrupte munisipale amptenare en raadslede verantwoording doen vir verliese deur munisipaliteite weens korrupsie.”

Volgens Zuma is groot vordering gemaak in die stryd teen misdaad en korrupsie. “ʼn Totaal van 234 regeringsamptenare is sedert 2014 vir korrupsieverwante misdade in hegtenis geneem en vervolg. Tydens die 2015/16-boekjaar, is beslagleggingsbevele toegestaan op bates van R601 miljoen wat op ʼn onregmatige manier bekom is. Die regering het ʼn totaal van R4 miljard verhaal sedert 2009. Die teenkorrupsie-programme gaan voort.”

Talle sitplekke in die stadion was leeg terwyl Zuma sy toespraak gelewer het. Baleka Mbete, nasionale voorsitter van die ANC, het gesê dit was weens die hitte.

Volgens Zuma het die ANC tydens die munisipale verkiesing in 2011 ʼn beter lewe vir die mense belowe en het hulle sedertdien hul belofte gestand gedoen. “Die persentasie huishoudings wat krag het, het gestyg van 70% in 2001 tot 86% in 2014 wat beteken meer as vyf miljoen huishoudings het krag gekry.”

Zuma het gesê die aantal huishoudings met toegang tot lopende water het van 61% in 2001 tot 90% in 2014 toegeneem. “Huishoudings wat gratis waterdienste ontvang het, het van 7 miljoen tot 11 miljoen toegeneem in 2013.”

Volgens Zuma is die ANC bekommerd oor die aantal mense, veral jongmense, wat werkloos is. “Ons land, ons kontinent en die wêreld beleef stadige ekonomiese groei. Die ANC het ʼn plan om op die stadige groei te reageer en werksgeleenthede te skep.” Hy het gesê ʼn negepunt-plan word op nasionale vlak deur die ANC-regering geïmplementeer om ekonomiese groei aan te wakker.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

50 Kommentare

jongste oudste gewildste
Jordaan

Kan nie skryf wat ek dink nie! Hy moet begin deur te bedank, hoe kan mens so tweegesig wees deur sulke dinge te beloof en agteraf die staatskas rot en kaal besteel?

nelma jacobs

Ek stel voor ons geagte prez begin met die uitroei van korrupsie by homself want hy is n goeie voorbeeld van uiterste korrupsie

Julius

En toe daag minder as die helfte op van die 100000 wat hulle verwag het. Die boodskap kom nou deur, hulle het meer as 50% stemme verloor.

wag maar

Ha ha hi hi ..um (keel knor) Shjoe, wat nog.?

haha

Hy moet maar in die spieel kyk en die persoon wat terug kyk afdank