Zuma kry wéér sy sin

Oudpres. Jacob Zuma. (Foto: Sandile Ndlovu/Pool)

Oudpres. Jacob Zuma se verhoor in die korrupsiesaak teen hom en die Franse wapenvervaardiger Thales is vir die soveelste keer uitgestel – dié keer omdat Zuma verkies om nie vanuit die tronk verhoor te word nie.

“Die verhoor sal nou van 10 tot 13 Augustus aangehoor word,” het regter Piet Koen Dinsdagoggend beslis terwyl Zuma aanlyn vanaf die Estcourt-gevangenis in KwaZulu-Natal by die hooggeregshof in Pietermaritzburg ingeskakel het.

Die oudpresident se regspan het Maandag versoek dat die verhoor “onder die huidige omstandighede” vir drie weke uitgestel word. Zuma dien tans tronkstraf uit vir minagting van die hof terwyl onluste die afgelope week uitgebreek het uit verset teen sy inhegtenisneming.

“Die Grondwet het uiteindelik geseëvier!” het die Zuma-stigting intussen getwiet in reaksie op Koen se besluit om die verhoor uit te stel.

“Daar kan geen virtuele strafregtelike verrigtinge in die afwesigheid van ’n beskuldigde wees wat nie met sy advokate kan konsulteer nie.”

Zuma word deur 16 klagte in die gesig gestaar vir die 1999-aankoop van onder meer vegvliegtuie, patrolliebote en weermagtoerusting van vyf Europese firmas terwyl hy Suid-Afrika se adjunkpresident was.

Hy word daarvan beskuldig dat hy sowat R4 miljoen in omkoopgeld van een van die maatskappye, die Franse vervaardigingsreus Thales, in sy sak gesteek het. Thales staan ook tereg op aanklag van korrupsie en geldwassery.

Maroela Media het vroeër berig Zuma se advokate het tydens hul aansoek om uitstel aangevoer dat die oudpresident benadeel sal word, sou hy gedwing word om aanlyn verhoor te word en telefonies eerder as in ’n hof met sy regspan te konsulteer.

Zuma dien tans 15 maande tronkstraf uit vir minagting van die hof nadat hy geweier het om voor die Zondo-kommissie van ondersoek na staatskaping te getuig.

Zuma se verdediging het vroeër vandeesmaand in ’n aansoek gevra dat die Konstitusionele Hof sy besluit oor Zuma se tronkstraf herroep.

Uitspraak is voorbehou.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

50 Kommentare

jongste oudste gewildste
Michal

wat anders, die regtelike sisteem vat ons almal vir pop

Ja wat

Bla bla bla.Hy call nou die shots uit die tronk soos al die ander doen.

Michael

Dis die regte besluit-sy regsspan en die hof is reg

Maggies

Dom besluit. Gee genoeg tyd om ‘n goeie onrus beweging te reël.

Johann

Piet Koen is sy naaam. Die nuutste “regter” wat in lyn is met sy ZUMAIKIE status.