Zuma nie in hof: Lasbrief uitgereik

Oudpres. Jacob Zuma tydens ‘n vorige hofverskyning. (Foto: Michele Spatari/ AP)

ʼn Lasbrief is Dinsdag in die hooggeregshof in Pietermaritzburg uitgereik vir die inhegtenisneming van oudpres. Jacob Zuma.

Regter Dhaya Pillay het gesê daar is nie genoegsame inligting oor Zuma se gesondheidstoestand aan die hof verskaf nie. Die saak is tot 6 Mei uitgestel. Dit is ook eers van dié datum af wat die lasbrief van krag sal wees as daar nie in die tussentyd meer inligting oor sy gesondheidstoestand ingedien word nie.

Staatsaanklaer adv. Billy Downer het versoek dat ʼn lasbrief uitgereik word nadat Zuma nie vir sy hofverskyning opgedaag het nie.

Die hof het eers gehoor dat daar nie ʼn mediese sertifikaat verskaf is nie, maar daar is kort daarna ʼn mediese sertifikaat van 1 Militêre hospitaal ingehandig. Pillay het egter talle vrae oor dié dokument gehad.

Volgens Downer is die staat voor die tyd ingelig dat Zuma nie Dinsdag in die hof sou wees nie, maar is opvolgkorrespondensie aan sy regsverteenwoordiger, adv. Daniel Mantsha, rakende ʼn mediese sertifikaat en Zuma se siektetoestand nie beantwoord nie.

“Zuma se afwesigheid is teleurstellend en ons wil hê mnr. Mantsha moet vir ons sê wat die siektetoestand is en hoekom Zuma nie hier kan wees nie.

“Dit is ʼn kriminele oortreding deur die beskuldigde om nie teenwoordig te wees indien hy gewaarsku is om in die hof te wees nie.”

Matsha het op sy beurt gesê Zuma se siektetoestand is ʼn saak van “staatsveiligheid” en dat hy deur militêre dokters behandel word.

Daar is wel bekend gemaak dat Zuma in November landuit geneem is vir mediese behandeling voordat hy in Desember teruggekeer het. Hy het in Januarie twee operasies ondergaan in ʼn hospitaal in Pretoria voordat hy op 23 Januarie weer landuit geneem is vir verdere mediese behandeling.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

47 Kommentare

jongste oudste gewildste
Porseleintjie

Siektetoestand: Arrogansie. Steeds verhewe bo die wet.

Pieter

Mooi man
Nou wie betaal vir sy land uitgaan dokters

Niel

dis ‘n vierwiel motorfiets siekte ;-)

Ronalda

Watter siekte het hy dat dit buitelands behandel moet word? Laat hy soos die res gaan sit in n staatshospitaal en sy beurt afwag!

netekalleen

Dit maar net n manier om weer vir die gereg weg te kruip