Zuma se neef beboet kerk met vier bokke

Argieffoto (Foto: ansi.okstate.edu)

ʼn Kerk in Eshowe in KwaZulu-Natal is met vier bokke beboet nadat dit glo Sibusiso ‘Deebo’ Mzobe se voorvaders se vrede gesteur het.

Mzobe het glo die Rooms Katolieke kerk beboet nadat dit suikerriet op die noordelike plaas gebrand het waar sy poligamiese oupa en sy drie vroue begrawe is. Die Sunday Times berig Mzobe is pres. Jacob Zuma se neef.

Biskop Xolelo Kumalo van die Eshowe katolieke bisdom het aan die koerant gesê dit is ʼn verrassing dat daar grafte op die grond is. “As ʼn kerk respekteer ons kultureel die grafte,” het Kumalo gesê. Hy sê Mzobe moes die kwessie met die plaaslike stamhoof, Sithembiso Ntuli, bespreek het.

Ntuli het egter aan die Sunday Times gesê volgens sy inligting is daar geen grafte op die grond nie. Hy het egter ingestem dat Mzobe die grond moet kry om “enige konfrontasie” te verhoed.

Mzobe wou nie kommentaar lewer nie en het alle navrae na sy familiewoordvoerder verwys. -SAPA