Zuma sê optogte wys ‘rassisme is ʼn werklikheid’

Pres. Jacob Zuma by die gedenkdiens vir die struggle-veteraan, Chris Hani, in Boksburg (10 April 2017). Foto: GCIS

Pres. Jacob Zuma het Maandag gesê verlede week se optogte wat landwyd gehou is om te eis dat hy uit sy posisie verwyder word, is ʼn bewys dat rassisme steeds ʼn werklikheid in Suid-Afrika is.

Opposisiepartye en burgerlike regte-organisasies het verlede week massa-optogte reg oor die land gehou om te eis dat Zuma bedank na aanleiding van sy onlangse middernagtelike kabinetskommeling waartydens Pravin Gordhan as minister van finansies die trekpas gekry het.

Nog ʼn massa-optog word vir Woensdag 12 April beplan wanneer optoggangers van kerkplein tot by die Uniegebou in Pretoria sal stap op dieselfde dag wat Zuma sy 75ste verjaarsdag vier.

Zuma het Maandag tydens ʼn gedenkdiens vir die struggle-veteraan Chris Hani ʼn beroep op Suid-Afrikaners gedoen om teen rassisme te veg ter herdenking van Hani wat sy lewe lank daarteen geveg het. “Ons het ongelukkig nog nie daarin geslaag om die nie-rassige samelewing wat ons beoog het te bou nie. Daar is ʼn herlewing van rassisme is ons land,” het hy gesê.

“Dit is ook duidelik dat rassiste meer gewaagd geraak het. Die optogte wat verlede week gehou is, demonstreer dat rassisme ʼn werklikheid is en steeds in ons land bestaan,” het Zuma gesê. “Baie van die plakkate en banniere wat omhoog gehou is, het menings weerspieël wat ons gedink het in 1994 al begrawe is, soos plakkate wat swart mense as bobbejane uitgebeeld het. Dit is duidelik dat sommige van ons wit landgenote swart mense as minder menslik of ’n sub-mens sien.”

ʼn Kranslegging ter herdenking van Hani se dood is in Elspark in Boksburg gehou. Hani is op 10 April 1993 tydens ʼn sluipmoordaanval buite sy huis in Dawn Park in Boksburg vermoor.

Zuma het gesê Suid-Afrika moet verby rassistiese uitlatings en openbare vertonings kyk in ʼn poging om rassisme hok te slaan. “Rassisme is ʼn growwe oortreding van menseregte wat hierdie land dekades lank in konflik gedompel het. Ons kan nie toelaat dat rassiste ons land agteruit neem nie,” het Zuma gesê.

Hy het verwys na die wetsontwerp oor die voorkoming en bestryding van haatmisdaad en haatspraak wat enige vorm van diskriminasie sal kriminaliseer.

Zuma het as deel van die seremonie ʼn gedenkplaat onthul om Hani se graf en die Chris Hani Memorial en Walk of Remembrance as ʼn nasionale erfenisterrein te verklaar.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

84 Kommentare

jongste oudste gewildste
Dissie

Waar is die foto’s? Waar is die bewyse? Uit jou duim gesuig? Seker net nog ‘n leuen net om verdeeldheid te bring wanneer almal in ‘n eenheid teenoor hom opstaan!

pamela Woest

Mr Zuma. Jy sien niks verkeerd met jouself nie. Daai optogte het alle kleure Suid Afrikaner bevat, nie NET wit of NET swart nie. Mr Zuma, bedank eerder.

Xavier

Maar natuuuuuurlik is daar steeds rassisme salank daar rassistiese wetgewing is. Kom ons kyk na BEE en ‘Employment Equity’ en regstellende aksie….nie eens van quota’s in sport te praat nie!!! Al daardie wetgewing het sy wortel in die euwel wat is Rassisme! So, as die hoogste gesag, naamlik wette, rassisme aanhits, sal daar mos rassisme onder die bevolking heers!

lw

Ly hy aan dementia? Of is dit hoog tyd dat hy weer gaan vir ñ oogtoets! Almal is keelvol vir hom – oor die rasgrense heen.
Hy is ñ bedrieer en niemand glo sy snert mee nie – net die Zuma lojaliste wie hul beursies wil volstop!

Spook

Regtig? Is dit al rympie wat ky ken? Ek het laas in die kleuterskool met iemand gestry met die intelligensie vlak . Ou twenty eleventy seven and three!