Zuma wil aanklaer privaat vervolg

Oudpres. Jacob Zuma (Foto: Jerome Delay/AFP)

Oudpres. Jacob Zuma het Sondag aangekondig dat hy van voornemens is om adv. Billy Downer, hoofaanklaer in sy korrupsieverhoor, privaat te laat vervolg oor die uitlek van sy mediese rekords.

Zuma, wat Dinsdag sy 80ste verjaarsdag vier, se hofsaak hervat Maandag in die Pietermaritzburg-hooggeregshof. Zuma en die Franse wapenvervaardiger Thales staan tereg op verskeie aanklagte van bedrog, swendelary en geldwassery wat verbind word met ʼn multi miljard rand se wapentransaksie.

Mzwanele Manyi, woordvoerder van die Jacob Zuma-stigting, het in ʼn verklaring gesê dat hy die afgelope week desperate pogings deur die Nasionale Vervolgingsgesag (NVG) gesien het om Downer se naam skoon te hou. “Lede van die media sal weet dat Sy Eksellensie die president ongeveer ses maande gelede, op 21 Oktober 2021, by die Pietermaritzburg-polisiestasie was om ernstige strafregtelike klagtes teen adv. Downer en sy medepligtiges aanhangig te maak.”

Manyi sê dit hou verband met die uitlek van vertroulike inligting aan ʼn verslaggewer, in oortreding van die NVG-wet en dit is onder eed ook só bevestig deur Downer.

“Die NVG het sedertdien sy voete gesleep en allerhande verskonings aangebied vir ʼn gebrek aan vordering in die ondersoek na Downer en die ander. ʼn Raserny van aktiwiteit het egter die afgelope week ontstaan toe die polisie op 1 April 2022 ʼn verklaring in Kaapstad van adv. Breitenbach SC, een van die geïmpliseerde vervolgers, geneem het en nóg ʼn verklaring op 7 April van Karyn Maughan by die Rosebank-polisiestasie in Johannesburg.

“In die middel hiervan en op 5 April is ʼn besluit deur die NVG geneem dat hy nie adv. Downer gaan vervolg nie. Deur die verwarring heen blyk dit dat die linkerhand nie geweet het wat die regterhand doen nie.”

Zuma het nou sy regspan opdrag gegee om met onmiddellike effek te begin met privaat vervolging teen Downer.

Zuma sal na verwagting Maandag ook versoek dat die hofsaak weer uitgestel word. “Al wat Sy Eksellensie pres. Zuma rêrig wil hê is sy dag in die hof, in ʼn regverdige verhoor en beslis nie in ʼn forum wat deur die staat gemanipuleer word nie. Die vorige onregverdige en verkeerde besluite sal hopelik deur ander hoër howe reggestel word.” Zuma se span sal egter vir uitstel vra “omdat die toestande tans klaarblyklik nie ʼn regverdige verhoor gaan verseker nie”. “Die regspan van pres. Zuma is egter gereed om sy saak môre voor te hou en totdat geregtigheid seëvier,” het Manyi bygevoeg.

BREAKING:
H.E President Zuma, has decided that Private Prosecution is the ONLY way to deal with the removal of the NPA's Adv Downer and has instructed his legal team to set the wheels in motion.
Also, the reconsideration application has been filed with the President of the SCA pic.twitter.com/7pOmb9417F

— JGZuma Foundation (Official) (@JGZ_Foundation) April 10, 2022