Kirsty Theologo se ma, Sylvia (links) en ‘n familielid, Liesha du Toit Foto: Werner Beukes/SAPA
Courtney Daniels sal glo ontken dat sy sataniese elemente tot ‘n ritueel, gebaseer op ‘n teksvers uit die Bybel, voorgestel het, het ‘n Johannesburgse hof Maandag gehoor.
“Daniels was nie van die plan om moord te pleeg bewus nie,” het haar prokureur Enrico Guarneri aan die hooggeregshofsitting in die Palm Ridge-landdroshof aan die Oos-Rand van Johannesburg gesê.
Daniels, Lindon Wagner, Harvey Isha en Robin Harwood word daarvan beskuldig dat hulle twee meisies tydens ‘n beweerde sataniese ritueel aan die brand gesteek het. Kirsty Theologo was 18 jaar oud toe sy en haar vriendin op 21 Oktober 2011 op ‘n koppie in die suide van Johannesburg vasgebind en aan die brand gesteek is nadat petrol oor hulle uitgegooi is. Theologo het in die hospitaal aan haar beserings beswyk, haar vriendin het die aanval oorleef.
Guarneri het gesê Daniels, wat tydens die voorval minderjarig was, was slegs bewus van ‘n ritueel waar ‘n geestelike wese ontbied sou word. Sy het glo nie geweet dat die groep beplan het om Theologo te vermoor nie.
Lester Moody, wat erken het dat hy die meisies aan die brand gesteek het, het teen die vier beskuldigdes getuig. Moody en Jeremy King het ‘n pleitooreenkoms met die staat aangegaan in ‘n poging om ‘n korter vonnis opgelê te word. Moody is tot 17 jaar tronkstraf gevonnis, waarvan vyf opgeskort is, vir sy rol in die moord.
“Jy het jou getuienis fabriseer weens die goeie ooreenkoms wat jy met die staat aangegaan het,” het Guarneri Maandag aan Moody gesê. Hy sê Daniels het nie, soos die hof verlede week aangehoor het, brandende kerse in die vorm van ‘n pentagram geplaas nie. Hy sê die hof sal binnekort hoor hoe Wagner die pentagram geteken het en die kerse op elk van die vyf punte geplaas het.
Hy het aan Moody gesê hy vind dit “vreemd” dat sy geskrewe verklaring nie ooreenstem met die getuienis wat hy in die hof gegee het nie. Hy sê dit is interessant dat sekere dinge, wat in King se verklaring as getuienis aangebied is, wat nie in Moody se verklaring was nie, nou as getuienis in die hof gehoor word. Hy wou by Moody weet waarom hy nie in sy geskrewe verklaring, wat by die polisie in die teenwoordigheid van sy prokureur, melding gemaak het van die “match-maker”-speletjie nie. Maroela Media het vroeër oor dié speletjie, wat met toiletpapier en vuurhoutjies gespeel word, berig. Klik hier om meer te lees.
Guarneri het weer die gebeure, wat uiteindelik in die ritueel geëindig het, met Moody bespreek, toe hy ontdek het dat Moody teenstrydige getuienis aanbied.
Moody het verlede week getuig dat Wagner voorgestel het dat Isha vir die moord blameer moet word. Moody het gesê Wagner het dit die Saterdag ná die ritueel voorgestel, toe hy en die vier beskuldigdes buite Wagner se ma se woonstel bymekaar gekom het.
Die hof het Maandag egter gehoor dat Wagner nié die voorstel aan die groep kon gemaak het nie, aangesien hy ten tye van die vergadering in die woonstel was. “Jy is die een wat die voorstel gemaak het,” het Guarneri gesê. Moody het dit ontken.
Guarneri sê toe sy kliënt aanvanklik gehoor het hoe Moody voorstel dat hulle Theologo moet offer, sy hom nie ernstig opgeneem het nie, aangesien hy soveel dagga gerook het. Hy sê Daniels het nie op die koppie agter die Linmeyer-swembad remvloeistof in Theologo en haar vriendin se drankies gegooi nie. Hy sê sy was nie bewus daarvan dat enigiemand anders in die groep planne beraam het om die twee meisies met remvloeistof te bedwelm nie. Guarneri sê toe Theologo ‘n slukkie geneem het, en gesê het dat dit vreemd proe, sy kliënt selfs voorgestel het dat Theologo gemmerbier daarby moet gooi om dit te verdun.
Moody het getuig dat Daniels te bang was om haar hand te sny sodat sy, tydens die ritueel, bloed op ‘n brandende Bybel kon stort. Hy het getuig dat sy haar hand vir Wagner gegee het wat toe haar palm gesny, en bloed oor die Bybel gedrup het. Guarneri sê dit is nie die waarheid nie, aangesien Wagner kragdadig sy kliënt se hand gegryp en dit gesny het.
Guarneri sê voordat die meisies aan die brand gesteek is, het Wagner Theologo se vriendin gewurg en vir die res van die groep gesê sy is dood. Daniels het toe glo na die meisie gegaan, haar pols probeer kry, en bevind dat sy steeds lewe. Sy het glo vir Wagner gejok en ingestem dat die meisie dood is, sodat hy haar moet uitlos.
Moody sê hy onthou nie hierdie weergawe van die gebeure nie. Hy sê hy het nooit planne gehad om te jok nie, aangesien dit meer probleme vir hom op die hals sal haal.
Die saak duur Dinsdag voort.
Lees ook:
Sataniese ritueel: Getuienis bevraagteken
‘Sataniese ritueel’: Slagoffer is “braaivleis” genoem
‘Sataniese ritueel’: Kirsty was glo “prostituut” van die Bybel
‘Sataniese ritueel’: Bloed op ‘n brandende Bybel gestort
Sataniese ritueel: Skokkende onthullings
Sataniese ritueel: Slagoffer wou letsels in hof wys
Sataniese ritueel: Kirsty wou glo geoffer word
‘Sataniese ritueel’: Ma’s, slagoffer se broer getuig
‘Sataniese ritueel’: Slagoffer se ma getuig
‘Sataniese ritueel’: Moordsaak hervat
Borgaansoek vir twee verdagtes in sataniese ritueelsaak
Meisie (18) aan die brand gesteek tydens ‘sataniese ritueel’
