ʼn 7-jarige seun het verdrink nadat hy Maandagmiddag deur ʼn seestroom by Melkbosstrand, Kaapstad, meegesleur is.
Die seun is geïdentifiseer as Tyrique Fortuin van Atlantis. Volgens die Nasionale Seereddingsinstituut (NSRI) het hy omstreeks 14:00 saam met ʼn groep vriende in die kalm see geswem, toe die seestroom hom skielik meegesleur het. Sy maats het hulp ontbied en ʼn soektog is van stapel gestuur.
ʼn Span lewensredders het later in die omgewing waar hy vermis geraak het op sy liggaam afgekom.
Volgens Wilfred Solomons-Johannes, ʼn woordvoerder van die stad se rampbestuursentrum, ontvang die seun se familie en vriende traumabehandeling.