Seuns verdrink in getypoel

Twee seuns het Woensdag in die Monwabisi-getypoel aan die Valsbaaise kus verdrink.

Craig Lambinon, woordvoerder van die Nasionale Seereddingsinstituut (NSRI), sê vyf seuns van Tafelsig, Mitchells Plain het glo saam in die getypoel geswem toe twee van hulle in die moeilikheid geraak het. Hy sê die drie ander seuns het alarm gemaak. “Die liggame van twee negejarige seuns is onder die water gevind.” Lambinon sê paramedici het mond-tot-mond-asemhaling toegepas maar hulle is op die toneel dood verklaar. Die saak word ondersoek.