Corrie Sanders, net nadat hy Wladimir Klitschko in Maart 2003 uitgeklop het, en die WBO kampioen geword het.
Die polisie het Dinsdag bevestig dat hulle steeds opsoek is na die ʼn groep verdagtes wat die voormalige swaargewigbokskampioen, Corrie Sanders, die naweek by ʼn restaurant doodgeskiet het.
“Niemand is nog in verband met die voorval in hegtenis geneem nie en ondersoek duur voort,” het Brigadier Thulani Ngubane, ʼn polisiewoordvoerder, gesê.
Die 46-jarige bokser was Saterdagaand by die Thatch Haven Country Lodge in Brits om sy broerskind, Michael Sanders, se 21e verjaardagpartytjie te vier, toe rowers opgedaag en lukraak begin skiet het. Die rowers het klante by die restaurant van hul persoonlike besittings beroof. Sanders is tydens die voorval in die maag en hand geskiet en het Sondagoggend in die Kalafong-hospitaal aan sy beserings dood.
