Soektog na vermiste paartjie duur voort

Jo-Ann en Garreth Muller.

Die polisie in Uitenhage in die Oos-Kaap soek steeds onverpoosd na ʼn jong getroude paartjie wat op Goeie Vrydag vermis geraak het.

ʼn Polisiewoordvoerder, ao. Gerda Swart, sê Garreth en Jo-Ann Muller, albei 22, is Vrydagoggend laas gesien toe hulle by Garreth se pa se huis gestop het. Swart sê Garreth het aan sy pa gesê dat hulle na ʼn woonstel in Strelitzia Park wil gaan kyk om dit moontlik te huur. Familielede kon die paartjie, wat reeds drie jaar getroud is, sedertdien nie kontak nie. Swart sê die polisie het intussen vasgestel dat die paartjie die motor waarin hul gery het, ʼn donkergrys Volkswagen CitiGolf Sonic, dieselfde dag van hul verdwyning aan ʼn man buite die dorp verkoop het. “Die man wat die motor by hul gekoop het, het ʼn berig in ʼn koerant gelees oor hul verdwyning en agtergekom hy het die motor by hulle gekoop. Hy het die polisie gekontak.” Sy sê die motor behoort aan ʼn familielid. Swart sê die paartjie se gesinne is “rasend van bekommernis.”

Garreth het ʼn mosterdkleurige hemp en ʼn donker denimbroek met wit tekkies aangehad op die dag sy verdwyning. Hy is sowat 1,78m lank en het donker hare. Dit is nie duidelik wat Jo-Ann aangehad het op die dag van hul verdwyning nie. Sy is sowat 1,65m lank en het donkerbruin/swart hare. Sy het ʼn tatoeëermerk van ʼn vlinder op haar regter enkel.

Enigiemand met inligting kan ao. Wilfred Swartbooi kontak by 083 533 3776.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.