Twee soldate is Vrydag glo deur ‘n derde soldaat in die Oos-Vrystaat doodgeskiet.
“’n Kriminele ondersoek duur voort,” het brig.gen. Xolani Mabanga, woordvoerder van die Suid-Afrikaanse Nasionale Weermag (SANW) gesê. Die drie mans was glo in ‘n amptelike voertuig van die militêre basis in Fouriesburg onderweg na die tydelike basis op Kromdraai toe die voorval plaasgevind het. Kanonnier ML Hlubi (24) het lt. Thabiso Ernest Seithati (28) en kanonnier Zakhe Nkanyiso khumalo (26) glo doodgeskiet. Hy het hul liggame glo uit die voertuig verwyder en verder gery.
Mabanga sê Hlubi word van die moorde aangekla en het Maandag in die hof verskyn. Hy is na die polisiestasie in Bethlehem oorgeplaas en sal weer op 4 Maart in die landdroshof in Bethlehem verskyn.