Agtien spelers van die Springbokspan wat in 2007 die wêreldbeker-toernooi gewen het, is ingesluit in die groep van 30 spelers wat sal probeer om die Web Ellis-beker suksesvol te verdedig.
Die groep is Dinsdagaand tydens ʼn regstreekse uitsending op SuperSport aangekondig. John Smit voer weer die span aan. Smit, Victor Matfield, Bakkies Botha, Jaque Fourie en Danie Rossouw sal almal hul derde Wêreldbeker-toernooi speel. Die groep bestaan uit nege spelers wat vanjaar in die Super Rugbyreeks vir die Bulle uitgedraf het, agt vir die Haaie en sewe vir die Westelike Provinsie. Die Springbokke vertrek op 1 September na Nieu-Seeland vir die wêreldbeker-toernooi. Hulle eerste wedstryd is op 11 September teen Wallis in Wellington.
Die groep is: Willem Alberts, Gio Aplon, Bakkies Botha, Heinrich Brüssow, Schalk Burger, Juan de Jongh, Jean de Villiers, Bismarck du Plessis, Jannie du Plessis, Fourie du Preez, Jaque Fourie, Bryan Habana, Francois Hougaard, Butch James, Pat Lambie, Francois Louw, Victor Matfield (ok), Tendai Mtawarira, Johann Muller, Odwa Ndungane, Ruan Pienaar, JP Pietersen, Chiliboy Ralepelle, Danie Rossouw, John Smit (k), Pierre Spies, Gurthrö Steenkamp, Frans Steyn, Morné Steyn en CJ van der Linde.