ʼn KwaZulu-Natalse staatsaanklaer is in hegtenis geneem en het in die hof verskyn nadat hy glo ʼn 23-jarige vrou in sy kantoor verkrag het.
Kapt. Thulani Zwane, woordvoerder van die polisie, sê die saak is tot Vrydag uitgestel wanneer die aanklaer na verwagting om borg sal aansoek doen. Zwane sê die vrou was glo saam met haar kêrel by die hof toe die aanklaer, wat nie geïdentifiseer mag word voor hy op die aanklagte teen hom gepleit het nie, haar glo na sy kantoor geroep en verkrag het. Die vrou het haar kêrel vertel wat gebeur het en ʼn saak is by die polisie aanhangig gemaak. Die staatsaanklaer het die vrou glo R3 000 aangebied om die saak terug te trek. Die aanklaer word van verkragting, korrupsie en regsverydeling aangekla.