Carl Pistorius, Oscar se broer, staar self klagtes van strafbare manslag in die gesig nadat hy glo ‘n vroulike motorfietsryer in 2008 omgery het.
eNews Channel Africa (eNCA) het Sondagoggend dié nuus bekendgemaak. Carl se verhoor moes op 21 Februarie begin het, ‘n dag voordat Oscar op R1 miljoen in die Pretoriase landdroshof vir die moord op Reeva Steenkamp vrygelaat is. Kenny Oldwage, Carl se prokureur, wat ook deel is van Oscar se regspan, hou vol dat die vrou in Carl se motor vasgery het, en dat hy onskuldig verklaar sal word.
eNCA berig verder dat Carl se verhoor na die einde van Maart verskuif is.
Beamptes het intussen Oscar reeds by sy oom se huis in Pretoria besoek. Sy verhoor is geskeduleer om op 4 Junie te begin.