Student in regsgeding met CIA oor Mandela-arrestasie

ʼn Student het ʼn regsgeding teen die Amerikaanse intelligensiediens (CIA) van stapel gestuur ten einde dokumente te bekom wat glo wys dat die intelligensiediens aandadig was in die inhegtenisname van oudpresident Nelson Mandela.

Mandela is verlede maand in die ouderdom van 95 oorlede. Hy is in 1962 in hegtenis geneem, skuldig bevind tydens die Rivonia-verhoor en het tronkstraf uitgedien op Robbeneiland. Ryan Shapiro, ʼn PhD-student aan die Massachusetts Institute of Technology, het die regsgeding aanhangig gemaak nadat die CIA glo geweier het om te voldoen aan ʼn versoek ingevolge wetgewing om inligting te verskaf oor Mandela se inhegtenisname. “Hoewel dit lankal bekend is dat Amerikaanse-intelligensie betrokke was by die inhegtenisname van Mandela, is min gedetailleerde inligting daaroor beskikbaar,” sê Shapiro in sy regsgeding. Shaprio versoek inligting oor hoekom die CIA Mandela glo as ʼn bedreiging beskou het. ʼn Woordvoerder vir die CIA het intussen gesê hulle lewer nie kommentaar op sake wat tans voor die hof dien nie.