Twee wildbewaarders is ernstig beseer nadat drie swartrenosters hulle Donderdagoggend in ʼn wildreservaat in KwaZulu-Natal aangeval het.
Musa Mntambo, woordvoerder van die KwaZulu-Natalse natuurbewaringsdienste (Ezemvelo), het aan Maroela Media gesê die voorval het omstreeks 09:00 in die Hluhluwe Umfolozi-natuurreservaat naby St. Lucia plaasgevind.
Die twee bewaarders, Z. Khuzwayo en S. Mthembu, was besig met ʼn roetine-patrollie deur die gebied en het onverhoeds op drie renosters afgekom.
“Die renosters het hulle aangeval. Een bewaarder is in die bobeen deurboor en die ander een in die boudspier. Hulle kon daarin slaag om die diere te verjaag,” het Mntambo gesê.
Die bewaarders het hulp ontbied en is na ʼn nabygeleë kamp geneem waar paramedici van Netcare 911 hulle behandel het. Chris Botha, ʼn woordvoerder van Netcare 911, sê die bewaarders is by die kamp gestabiliseer en in ʼn ernstige toestand na ʼn hospitaal geneem.
Volgens Mntambo is die mans se lewens buite gevaar en sterk hulle in die Richardsbaai-hospitaal aan.