Ondanks gure weersomstandighede het meer as 400 000 mense Durban se strande op Kersdag en Welwillendheidsdag bygewoon.
“Ongeveer 402 260 mense het verskeie strande in die omgewing besoek,” het Thabo Mofokeng, woordvoerder vir die Ethekwini-munisipaliteit, gesê. “Dit is ʼn toename van ongeveer 120 000 in vergelyking met dieselfde periode in 2012.”
Lewensredders moes 102 mense van verdrinking red. Niemand het nog sedert die aanvang van die feesgety by dié strande verdrink nie.
Sowat 365 kinders is na die munisipaliteit se kinderfasiliteit geneem nadat hulle van hul ouers geskei is. Altesaam 363 kinders is weer met hul ouers of versorgers herenig. Die polisie en die munisipaliteit se Veiliger Stede is versoek om die twee oorblywende kinders by te staan en hul ouers op te spoor.
Senior superintendent Eugene Msomi, woordvoerder vir die metropolisie, doen ʼn beroep op publieke vervoer om passasiers af te laai en dan na die betrokke parkeergebiede te ry.
Hy sê alkohol mag nie na strande gebring word nie en enigiemand met alkohol sal in hegtenis geneem word.
“Sedert die begin van die feesgety is 200 motoriste vir verskeie oortredings in hegtenis geneem. Padblokkades sal al hoe meer regdeur die stad opgerig word in die oploop tot Oujaarsaand,” het Msomi gesê.
Volgens die stad se munisipale wetgewing mag vuurwerke slegs tussen 23:45 op 31 Desember en 00:15 op Nuwejaarsdag afgevuur word.