Jacob Humphreys is in Desember 2011 op tien aanklagte van moord en vier van poging tot moord skuldig bevind nadat hy op 25 Augustus 2010 oor ’n spooroorgang in Buttskopstraat, Blackheath, gery het. Sy taxi het voor ’n aankomende trein beland en tien kinders is dood. Vier ander kinders is ernstig beseer. Hy is effektief tot 20 jaar tronkstraf gevonnis. Die hoogste hof van appèl het egter Vrydag sy vonnis na agt jaar verminder. Sy tien skuldigbevindings aan moord is ook vervang met 10 aanklagte van strafbare manslag. Die vier aanklagte van poging tot moord is ter syde gestel.
Robin Carlisle, LUV vir vervoer in die Wes-Kaap, sê die hoogste hof van appèl se besluit om Humphreys se vonnis te verminder is teleurstellend. “Ons gaan nooit roekelose en onverantwoordelike gedrag op ons paaie kan verander tensy daar ernstige gevolge is vir diegene wat dood op ons paaie veroorsaak nie.”