George Louca (heel agter) probeer sy gesig met ‘n baaitjie versteek tydens verlede week se hofverskyning. Foto: Werner Beukes / SAPA
George Louca, die man wat verdink word van die moord op Lolly Jackson, voormalige eienaar van Teazers, gaan na verwagting Dinsdag in die Kemptonpark-landdroshof verskyn nadat hy verlede naweek aan Suid-Afrika uitgelewer is.
Hy het op 10 Februarie in dieselfde hof verskyn waarna die saak tot 18 Februarie uitgestel is om Louca die geleentheid te gun om ʼn prokureur aan te stel. Hy word ook van geldwassery aangekla.
Staatsaanklaer JJ du Toit het tydens Louca se eerste hofverskyning gesê Louca, wat die alias George Smith gebruik het, is vermoedelik betrokke by vier kriminele sake by verskillende howe.
Louca is op 9 Februarie na Suid-Afrika gebring nadat sy finale verlof om appèl teen sy uitlewering in die appèlhof van Ciprus van die hand gewys is. Louca het verskeie pogings aangewend om sy uitlewering te verhoed.
Louca het uit Suid-Afrika gevlug nadat Jackson op 3 Mei 2010 by sy huis in Edenglen in die Oos-Rand vermoor is. Die Valke was sedertdien op sy spoor in verband met die moord. Hy het glo kort na die moord vir Joey Mabasa, hoof van misdaadintelligensie in Gauteng, gebel en daaroor gebieg. – SAPA
Lees ook:
Teazers-baas se moordverdagte in hof
George Louca uitgelewer aan SA
