ʼn 17-jarige seun is in Ravensmead, Kaapstad in hegtenis geneem nadat ʼn onthoofde lyk in ʼn klaskamer by ʼn verlate skool gekry is.
Lt.kol. Andre Traut, woordvoerder van die polisie, sê die polisie vermoed dat satanisme betrokke kan wees. “Die grusame ontdekking kom na ‘n deeglike ondersoek rakende die omstandighede van die moord. Dit het speurders gelei na ʼn adres in Connaughtstraat in Ravensmead.” Traut sê die vermiste kop is in die tuin van die verdagte se huis opgegrawe. Hy sê aandenkings wat by die verdagte se huis gevind is dui daarop dat satanisme moontlik die motief vir die moord was. Die verdagte sal na verwagting Maandag in die Parow-landdroshof verskyn.