Tienermeisie glo ontvoer op pad skool toe

‘n Man het na bewering ‘n tienermeisie op pad skool toe in Roodepoort aan die Wes-Rand ontvoer.

ʼn Polisiewoordvoerder, lt. Kol. Tshisikhawe Ndou, sê ʼn grys Toyota Hilux-bakkie het Woensdagoggend omstreeks 07:00 langs twee meisies in Rina straat in White Ridge stilgehou. Ndou sê ʼn man het uitgeklim en die tienermeisie beveel om in die bakkie te klim. Toe die meisie geweier het, het hy ʼn vuurwapen op haar gerig terwyl die ander meisie weggehardloop het. Intussen het Missing Children SA die meisie as Louise de Waal geïdentifiseer. Volgens die organisasie is die man wat De Waal ontvoer het glo in sy vroeë 30’s, het hy kort bruin hare en donker oë. Die organisasie sê in ʼn verklaring die verdagte se bakkie het nie nommerplate op nie en dat hy gevaarlik is. De Waal het ‘n rooi en swart romp en ‘n swart trui met ‘n geel kraag gedra.